Civilnet
Պոլսի հայոց պատրիարքական փոխանորդ Արամ արքեպիսկոպոս Աթեշյանը, կրոնական ժողովի ատենապետ Դ Թաթուլ Ծ. վարդապետ Անուշյանի ուղեկցությամբ, ապրիլի 14-ին այցելել է Վաքըֆ գյուղ:
Անթաքիայի (Անտիոք) օդանավակայանում նրան դիմավորել են Անտիոքի հայկական եկեղեցու հոգևոր հովիվ Տ. Ավետիս քահանա Թապաշյանը և Իսկենդերունի Սբ Քառասնից Մանկանց եկեղեցու ծխական խորհրդի ատենապետ Կարպիս Քսատուրին:
Հասնելով Վաքըֆ գյուղ՝ հոգևորականները Սբ Աստվածածին եկեղեցում կատարեցին իրենց աղոթքը:
Պատրիարքարանի աղբյուրները հաղորդում են, որ ընդհանուր փոխանորդը եկեղեցու պարտեզում հանդիպում է ունեցել վերջերս Վաքըֆում հաստատված քեսապահայերի հետ: Հանդիպմանը ներկա էին համայնքային ղեկավար Ջեմ Չափարը, Սամանդաղըի նահանգապետ Սյուլեյման Օզչաքըջըն, ինչպես նաև շրջանի ոստիկանապետն ու զինվորական հարյուրապետը:
Արամ արքեպիսկոպոս Աթեշյանը պոլսահայության և համայնքային հաստատությունների կողմից աջակցություն հայտնելով քեսապահայերին՝ խոսել է նրանց հետ և տեղեկացել նրանց կարիքներից:
«Մենք կցանկանայինք այլ ուրախ առիթներով հյուրասիրել ձեզ այստեղ, սակայն առկա կացությունը պարզ է, ցանկանում ենք, որ դուք այստեղ զգաք, ինչպես հարազատ տանը: Մենք պատրաստ ենք ձեզ օգնել, և արդեն իսկ արված են որոշ քայլեր: Բարի գալուստ: Կարող եք հյուրընկալվել, որքան ցանկանում եք»,- ասել է Աթեշյանը ու հավելել, որ Վաքըֆում հաստատված քեսապահայերին ուղղված օժանդակությունը կշարունակվի: Ի դեպ՝ Աթեշյանի հետ հանդիպման ժամանակ քեսապահայ 23 տարեցներից հինգը ցանկություն է հայտնել մշտապես հաստատվել Վաքըֆում:
Մարտի 21-ի վաղ առավոտյան սիրիացի ապստամբների զինված խմբավորումները Թուրքիայի կողմից անցել էին սիրիական սահմանը և հարձակվել Քեսապի հայաբնակ շրջանի ու շրջակա գյուղերի վրա: Մարտի 22-ի երեկոյան Քեսապի գյուղերի բնակչությունն ամբողջությամբ արդեն տարհանվել էր Լաթաքիա:
Վաքըֆի մասին ավելին՝
Հարցազրույց Վաքըֆի համայնքապետ Ջեմ Չափարի հետ, «Ակօսի» թղթակից Քարին Քարաքաշլըի հոդվածը՝ Վաքըֆ գյուղում Քեսապից ապաստանած հայ ծերերի մասին, Վաքըֆից ֆոտոշարքը:
Ավելի շատ տեղեկությունների համար այցելեք ՍիվիլՆեթի Understanding Kesab կամ Սիրիաբաժինները:
Պատմություններ
