Մնաց 4 ժամ

Բրազիլիայում կայանալիք ֆուտբոլի Աշխարհի 2014 թվականի առաջնության մեկնարկին հաշված ժամեր են մնացել: Երևանի ժամանակով 24:00-ին կսկսվի առաջին հանդիպումը. մրցաշարի հիմնական ֆավորիտը՝ տանտերերի հավաքականը, ուժերը կչափի Խորվաթիայի ընտրանու հետ: Մինչ այդ, Սան Պաուլու քաղաքի «Կորինտիանս Արենա» մարզադաշտում տեղի կունենա բացման հանդիսավոր արարողությունը:

Աշխարհի առաջնությանը հետևելու է ավելի քան երեք միլիարդ մարդ՝ անկախ սեռից, տարիքից, ռասսայից, զբաղեցրած պաշտոնից, անկախ ամեն ինչից: Բազմաթիվ երկրների նախագահներ արդեն հասցրել են կանխատեսումներ անել և հաջողություն մաղթել իրենց հավաքականներին: Այսօր միասնական լինելու կոչով հանդես է եկել նաև Հռոմի Պապ Ֆրանցիսկ 1-ինը: «Աշխարհի առաջնությունում բոլորիդ մաղթում եմ հաջողություն, միասնական եղեք»,- Twitter միկրոբլոգերի իր էջում գրել է Հռոմի Պապը:

Civilnet-ը նույնպես հաջողություն է մաղթում Աշխարհի առաջնության բոլոր մասնակիցներին, իսկ երկրպագուներին` անմոռանալի միամսյակ, որի ընթացքում մեր ընթերցողին կներկայացնենք Ֆուտբոլային բոլոր նորությունները, բոլոր գոլերն ու ամենահետաքրքիր տեսանյութերը: