Հոլանդական դաս՝ աշխարհի չեմպիոններին

2014 թ. Աշխարհի առաջնության խմբային փուլի առաջին տուրի ամենասպասված հանդիպումներից մեկն ավարտվեց և ավարտվեց ֆավորիտի խոշոր հաշվով պարտությամբ. Հոլանդիայի ընտրանին 5:1 հաշվով ռևանշի հասավ Իսպանիայի նկատմամբ: Հիշեցնենք, որ նախորդ Մունդիալի եզրափակչում Իսպանիան հենց Հոլանդիային էր հաղթել:

Հանդիպման սկիզբն անցավ առանց անակնկալների. Դել Բոսկեի սաները տիրեցին նախաձեռնությանը և, հետզհետե ճնշումն ավելացնելով, 27-րդ րոպեին հասան հաջողության, Վան Գալի սաները սեփական տուգանային հրապարակում կանոնները խախտեցին Կոստայի նկատմամբ, իսկ Չավի Ալոնսոն չվրիպեց 11 մետրանոց նշակետից: Նշենք, որ մինչ այդ Հոլանդիան մեկ վտանգավոր հակագրոհ կազմակերպել էր, սակայն Սնեյդերը միայնակ մնալով Կասիլիասի դեմ չկարողացավ գրավել վերջինիս դարպասը:

Գոլից հետո խաղի պատկերն ամբողջությամբ փոխվեց Վան Պերսին ու ընկերները տիրեցին նախաձեռնությանն ու խաղակեսի ավարտից մեկ րոպե առաջ հենց Վան Պերսին խփեց այս առաջնության առայժմ ամենագեղեցիկ գոլը:

Ընդմիջումից հետո խաղադաշտում մեկ թիմ էր՝ Հոլանդիան: Վան Գալի սաները ևս 4 անգամ գրավեցին Կասիլիասի դարպասը (Ռոբեն՝ 53 ր., 80 ր., Դե Վրիյ՝ 64 ր., Վան Պերսի՝ 72 ր.) և նույնքան անգամ էլ կարող էին աչքի ընկնել: