Civilnet
Ստամբուլի Ֆաթիհի շրջանում՝ Գում Գափուի Չափարիզ փողոցում, որը գտնվում է Պոլսի Հայոց պատրիարքարանի հարևանությամբ, հունիսի 14-ի լույս 15-ի գիշերը դանակահարվել և սպանվել է ՀՀ քաղաքացի 36-ամյա Համբարձում Հարությունյանը:
Թուրքական Doğan գործակալության տվյալներով՝ Հարությունյանը դանակահարվել է անհայտ անձանց կողմից՝ հենց փողոցի մեջտեղում: Թաղամասի բնակիչները, որոնք ականտես են եղել միջադեպին, զանգահարել են ոստիկանություն և շտապօգնություն:
Դանակահարողը փախել է դեպքի վայրից: Չնայած բժիշկների բոլոր ջանքերին՝ Հարութունյանը տեղում մահացել է: Նրա դին տեղափոխել են Հասեքիի հիվանդանոց: Դեպքի վայր ժամանած ոստիկանությունը սկսել է հետաքննությունը և աշխատանքներ է իրականացնում սպանողին հայտնաբերելու ուղղությամբ:
Դեպքի վայր են ժամանել նաև Համբարձում Հարությունյանի հարազատները:
Թուրքիայում գործող IMC հեռուստատեսության խմբագիրներից Արիս Նալջըն դեպքի վերաբերյալ ՍիվիլՆեթի հետ զրույցում հաստատեց, որ Հարությունյանը Հայաստանի քաղաքացի է: Նալջըի փոխանցմամբ՝ դեպքի ժամանակ վիրավորվել է նաև Հարությունյանի որդին՝ 14-ամյա Հենրիկը։
Համբարձումյանների ընտանիքը ապրում է Գում Գափուում: Սպանության մեջ կասկածվում է Ստեփան Ղազարյանը, որի նկատմամբ Ֆաթիհի շրջանի ոստիկանությունն արդեն հետախուզում է հայտարարել: «Ղազարյանը նույնպես Հայաստանի քաղաքացի է: Խոսակցություններ կան, որ նրանք երկուսն աշխատել են ռուսական մաֆիայի համար: Ամիսներ, նույնիսկ տարիներ շարունակ ոչ ոք չի ուզում նկատել, որ Յենիքափըում (Ստամբուլի թաղամաս) ադրբեջանցիների, վրացիների, ռուսների և հայերի մաֆիականացված խմբեր կան: Այսինքն, մեր ունեցած տեղեկությունների համաձայն՝ տեղի ունեցածը հայի ու թուրքի միջև անհամաձայնության հետևանք չէ և ոչ էլ ատելության հողի վրա սպանություն, այլ հայաստանցիների միջև ծագած խնդիր կամ էլ մաֆիայի ներքին հարց»:
Պատմություններ
