Civilnet
Eurosport-ը կազմել է Աշախարհի առաջնության խմբային փուլի առաջին տուրի խորհրդանշական հավաքականը:
Դարպասապահ՝ Քեյլոր Նավաս (Կոստա Ռիկա)
Կոստառիկացի դարպասապահն ամբողջ մրցաշրջանի ընթացքում փայլեց Իսպանիայի առաջնությունում, այժմ էլ հրաշալի խաղ ցուցադրեց Ուրուգվայի դեմ խաղում: Նրա դարպասը խաղից չկարողացան գրավել ո՛չ Էդիսոն Կավանին, ո՛չ Դիեգո Ֆորլանը, ոչ էլ Ուրուգվայի հավաքականի մյուս աստղերը: 11 մետրանոցից բաց թողած գոլում նա մեղք չուներ, դրա փոխարեն Նավասը երկու անգամ փրկեց իր թիմին՝ դառնալով հանդիպման լավագույն ֆուտբոլիստներից մեկը:
Աջ պաշտպան՝ Մատեո Դարմիան (Իտալիա)
Առաջին տուրի կենտրոնական խաղերից մեկի (Անգլիա - Իտալիա) ժամանակ «Նապոլիի» պաշտպանն ամբողջությամբ խաղից դուրս թողեց անգլիացիների առաջատար Ուեյն Ռունիին, ով հանդիպման ընթացքում ստիպված փոխեց եզրը: Բացի այդ, Դարմիանն ակտիվորեն մասնակցում էր իր թիմի հարձակվողական գործողություններին:
Կենտրոնական պաշտպան՝ Հեկտոր Մորենո (Մեքսիկա)
Թեև Ջովանի դոս Սանթոսը երկու գոլ խփեց, որոնք անհասկանալի պատճառով չհաշվեցին, Օրիբե Պերալտայի գոլը հաղթանակ պարգևեց Մեքսիկային, Կամերունի հետ խաղի իսկական հերոսը Հեկտոր Մորենոն էր: Կենտրոնական պաշտպանը 76 անգամ դիպել է գնդակին, ինչը նման հորդառատ անձրևի պայմաններում, անհավանական ցուցանիշ է: Մորենոն 89% ճշգրիտ փոխանցումներ է կատարել, իսկ խաղավարտին մոտ նրա կատարած սահանկումը մեկնաբանության կարիք չունի:
Կենտրոնական պաշտպան՝ Ջոն Բրուքս (ԱՄՆ)
Բրուքսը չէր խաղա Գանայի դեմ, եթե ամերիկացիների հիմնական կազմի պաշտպան Մեթ Բեսլերն առաջին խաղակեսի վերջնամասում վնասվածք չստանար: Նա ընդամենը չորրորդ հանդիպումն էր անցկացնում իր հավաքականում, բայց դա Ջոնին չխանգարեց ինքնակորույս նետվել Ասամոա Գյանի ու Քևին-Փրինս Բոատենգի հարվածների տակ, իսկ հետո խփել նաև իր թիմի հաղթական գնդակը:
Ձախ պաշտպան՝ Շիմե Վրսալկո (Խորվաթիա)
Վրսալկոն ընդամենը 22 տարեկան է, բայց Բրազիլիայի դեմ խաղի առաջին իսկ րոպեներից նա ամրոց էր կառուցել խորվաթական պաշտպանության ձախ եզրում և ահեղ մրցակիցներից ոչ մեկին ներս չէր թողնում: Օսկարը, Հալքը Պաուլինյոն ու Նեյմարն անընդհատ փորձում էին անցնել երիտասարդ պաշտպանից, սակայն ապարդյուն:
Ձախ կիսապաշտպան՝ Դեյլի Բլինդ (Հոլանդիա)
Հոլանդացի կիսապաշտպանը Իսպանիայի դեմ խաղում ամբողջությամբ գրավել էր ձախ եզրը, հասցնում էր նաև օգնել իր թիմի հենակետայիններին՝ պայքարելու Ալոնսոյի, Չավիի ու Ինիեստայի դեմ: Իսկ սեփական կիսադաշտից նրա կատարած երկու գոլային փոխանցումները դեռ երկար կհիշվեն. մի դեպքում Ռոբին Վան Պերսին խփեց իր կարիերայի լավագույն գոլերից մեկը, մյուս դեպքում Արիեն Ռոբենը միայնակ մնաց Կասիլիասի առջև:
Վալոն Բեհրամի (Շվեյցարիա)
Էկվադորի դեմ խաղում բոլորը սպասում էին, որ ընդմիջումից հետո Բեհրամին կփոխարինվի, բայց Շվեյցարիայի փորձառու մարզիչ Օտմար Հիթսվիլդը որոշեց նրան թողնել խաղադաշտում ու չսխալվեց: Հանդիպման վերջին վայրկյաններին Բեհրամին սեփական տուգանային հրապարակում մրցակցից խլեց գնդակը, անցավ ամբողջ խաղադաշտը և սկսեց իր թիմի գոլային գրոհը, որը հաղթանակ պարգևեց Շվեյցարիային:
Օսկար՝ կենտրոնական կիսապաշտպան (Բրազիլիա)
Մունդիալ 2014-ի բացման խաղից հետո երկրպագուները երկու մասի էին բաժանվել: Մի մասը պնդում էր, որ լավագույնը Նեյմարն է, մյուս մասն առավելությունը տալիս էր Օսկարին: Վերջինս ամբողջ հանդիպման ընթացքում ճշգրիտ փոխանցումներով սրում էր խաղը, իսկ մրցավարի ավելացրած ժամանակում նաև գոլի հեղինակ դարձավ՝ ամրապնդելով Բրազիլիայի հաղթանակը:
Աջ կիսապաշտպան՝ Արիեն Ռոբեն (Հոլանդիա)
4 տարի առաջ Աշխարհի առաջնության եզրափակչում Ռոբենը միայնակ մնալով Իկեր Կասիլիասի առջև չկարողացավ գրավել նրա պաշտպանած դարպասը, իսկ Հոլանդիան պարտվեց: Այս անգամ նա անկասելի էր. սկզբում գերազանց եզրափակեց Բլինդի փոխանցումը, ապա 37 կմ/ժ արագություն զարգացնելով շրջանցեց իրենից մեկ մետր առաջ գտնվող Սերխիո Ռամոսին ու դուբլ ձևակերպեց:
Ենթահարձակվող՝ Թոմաս Մյուլլեր (Գերմանիա)
Պորտուգալիայի հետ խաղում Մյուլլերը հանդես եկավ որպես իսկական առաջատար և դարձավ Մունդիալ 2014-ի առաջին հեթ-տրիկի հեղինակը
Հարձակվող՝ Ռոբին Վան Պերսի (Հոլանդիա)
Մինչև Իսպանիայի դեմ հանդիպումը, ոչ ոք չգիտեր՝ ինչ սպասել վնասվածքից նոր ապաքինված Ռոբին Վան Պերսիից, ինչպես նաև ամբողջ Հոլանդիայի հավաքականից: Խաղից հետո բոլորին պարզ դարձավ, որ Հոլանդիան ֆավորիտների թվում է, Վան Պերսին էլ առաջնության ռմբարկու դառնալու բոլոր հնարավորություններն ունի: Իսկ ֆուտբոլային աշխարհը դժվար թե մոռանա նրա անհավանական ցատկն ու առաջին գոլը:
Պատմություններ
