Civilnet
Աշխարհի առաջնության խմբային փուլում Կոլումբիայի հավաքականը երկրորդ անընդմեջ հաղթանակը տարավ և վաստակած 6 միավորով միանձնյա գլխավորում է C խումբը: Եթե առաջին տուրում կոլումբիացիները խնդիրներ չունեցան Հունաստանի հետ խաղում, ապա այսօր լուրջ դիմադրության արժանացան Կոտ դ՛Իվուարի ընտրանու կողմից:
Հանդիպման առաջին խաղակեսն անցավ լարված ու հավասար պայքարում, բայց դարպասի գրավում չարձանագրվեց: Ընդմիջումից հետո լատինամերիկացիները շատ ակտիվ էին և շուտով հասան հաջողության. 64-րդ րոպեին Ջեյմս Ռոդրիգեսը անկյունայինի խաղարկումից հետո գլխի հարվածով բացեց հաշիվը: 70-րդ րոպեին Խուան Քուինտերոն ամրապնդեց Կոլումբիայի առավելությունը, սակայն ընդամենը 3 րոպե անց Ժերվինյոն կրճատեց հաշվի տարբերությունը:
Գոլից հետո աֆրիկացիները էլ ավելի մեծ ճնշում սկսեցին գործադրել մրցակցի դարպասին, բայց այդպես էլ չկարողացան հավասարեցնել հաշիվը: Կոլումբիա - Կոտ դ'Իվուար` 2:1:
Այսպիսով, C խմբում Կոլումբիան ունի 6 միավոր, Կոտ դ՛Իվուարը` 3, Ճապոնիան ու Հունաստանը, որ քիչ անց կանցկացնեն երկրորդ տուրի իրենց հանդիպումը, դեռևս միավոր չունեն:
Պատմություններ
