Բելգիան կոտրեց Ռուսաստանի դիմադրությունը

Աշխարհի առաջնության խմբային փուլի երկրորդ տուրում Բելգիայի հավաքականը նվազագույն հաշվով պարտության մատնեց Ռուսաստանի ընտրանուն և վաստակեց 1/8 եզրափակչի ուղեգիր:

80 րոպե անհետաքրքիր խաղից հետո բելգիացիներն արթնացան ու մեկը մյուսի հետևից վտանգավոր գրոհներ կազմակերպեցին: 81-րդ րոպեին Քևին Միրալասի տուգանայինից կատարած հարվածից հետո գնդակը դիպավ դարպասաձողին: Այդուհետ բելգիացիների առաջատար Էդեն Ազարը մի քանի վտանգավոր անցում կատարեց: 88-րդ րոպեին նույն Ազարի փոխանցումից հետո Դիվոկ Օրիգին խփեց իր թիմի հաղթական գոլը: Մրցավարի ավելացրած ժամանակում Ազարը ևս մեկ հրաշալի անցում կատարեց, սակայն նրա փոխանցումից հետո Միրալասը միայնակ մնալով Ակինֆեևի առջև չկարողացավ գրավել վերջինիս դարպասը:

Այսպիսով, Բելգիան հաղթեց 1:0 հաշվով և ապահովեց իր տեղը փլեյ-օֆ փուլում, իսկ Ռուսաստանը մնաց մեկ միավորով: H խմբի երկրորդ տուրի մյուս խաղում ուժերը կչափեն Ալժիրն (0 մ.) ու Հարավային Կորեան (1 մ.):