Civilnet
Մունդիալ 2014-ի խմբային փուլի երկրորդ տուրում Պորտուգալիան ԱՄՆ-ի հետ խաղում վերջին վայրկյաններին փրկվեց պարտությունից:
Հանդիպումը շատ լավ մեկնարկեց պորտուգալացիների համար. արդեն 5-րդ րոպեն Նանին օգտվեց ամերիկացիների պաշտպանի սխալից և առաջ մղեց իր թիմին: Առաջին խաղակեսում Պորտուգալիան կարող էր կրկնապատկել առավելությունը, սակայն 45-րդ րոպեին նույն Նանիի հարվածից հետո գնդակը ետ մղվեց դարպասաձողից:
Ընդմիջումից հետո ամերիկացիները տիրեցին նախաձեռնությանը և շատ ավելի լավ էին խաղում քան Պաուլո Բենտոյի սաները: 54-րդ րոպեին Մայքլ Բրեդլին հաշիվը հավասարեցնելու գերազանց հնարավորություն ստացավ, բայց նրա հարվածից հետո մրցակցի պաշտպան Ռիկարդո Կոշտան գնդակը դուրս բերեց դատարկ դարպասից: 10 րոպե անց Ջերմեյն Ջոնսի հրաշալի հարվածից հետո Պորտուգալիային այլևս ոչինչ չփրկեց՝ 1:1:
85-րդ րոպեին արդեն ամերիկացիներն էին առջևում Էլինթ Դեփսին մոտ տարածությունից գնդակն ուղարկեց Բետոյի պաշտպանած դարպասը: Թվում էր Պորտուգալիան այլևս ոչինչ չի կարողանա անել և ժամանակից շուտ կլքի Մունդիալը, սակայն մրցավարի ավելացրած վերջին րոպեին Կրիշտանո Ռոնալդուի փոխանցումից հետո Սիլվեստր Վարելան հույս պարգևեց իր թիմին՝ 2:2;
Երկրորդ տուրից հետո G խմբում Գերմանիան ու ԱՄՆ-ը 4-ական միավոր ունեն, Գանան ու Պորտուգալիան՝ մեկական: Եթե Վերջին տուրի Գերմանիա - ԱՄՆ խաղն ավարտվի ոչ-ոքի արդյունքով, ապա Պորտուգալիան ու Գանան անկախ իրենց հանդիպման ելքից կլքեն Աշխարհի առաջնությունը:
Պատմություններ
