Մունդիալ 2014. 2-րդ տուրի ամփոփում

Ավարտվեց Մունդիալ 2014-ի խմբային փուլի երկրորդ տուրը, որը ոչնչով չէր զիջում առաջինին: 45 գոլ, 4 անակնկալ, 1/8 եզրափակչի 6 ուղեգիր, 5 անհաջողակ:

A խմբում 3 թիմ՝ Բրազիլիան, Մեքսիկան ու Խորվաթիան շարունակում են պայքարել փլեյ-օֆ մտնելու համար Կամերունը կորցրել է բոլոր հնարավորությունները: Երկրորդ տուրում Բրազիլիան անակնկալ ոչ-ոքի (0:0) խաղաց Մեքսիկայի հետ, իսկ Խորվաթիան ջախջախեց Կամերունին (4:0): Քիչ հավանական է, որ վերջին տուրում աշխարհի հնգակի չեմպիոնները խնդիրներ կունենան Կամերունի հետ, իսկ Խորվաթիան ու Մեքսիկան միմյանց միջև կխաղարկեն 1/8 եզրափակչի մյուս ուղեգիրը: 

B խմբում ընդհանուր առմամբ ամեն ինչ պարզ է. Հոլանդիան ու Չիլին 1/8 եզրափակչում են, Իսպանիան ու Ավստրալիան վերադառնում են տուն: Հենց այս խմբում գրանցվեց ամենամեծ անակնկալներից մեկը. աշխարհի գործող չեմպիոն Իսպանիան պարտվեց Չիլիին (0;2) և զրկվեց 1/8 եզրափակիչ մտնելու հնարավորությունից: Մյուս խաղում Հոլանդիան դժվարությամբ հաղթեց Ավստրալիային (3:2);  Վերջին տուրում Հոլանդիան ու Չիլին միմյանց միջև խաղում կպարզեն խմբի հաղթողին, իսկ Իսպանիան կփորձի փոքր-ինչ վերականգնել հեղինակությունը Ավստրալիայի դեմ խաղում:

C խմբում Կոլումբիան հաղթեց Կոտ դ՛Իվուարին (2:1) և դարձավ երրորդ հաջողակը, որը կմասնակցի 1/8 եզրափակչին: Մյուս խաղում Ճապոնիան ու Հունաստանը մեկական միավոր վաստակեցին (0:0); Երրորդ տուրում կկայանան հետևյալ հանդիպումները՝ Հունաստան - Կոտ դ՛Իվուար, Ճապոնիա - Կոլումբիա:

D խմբում գրանցվեց մյուս խոշոր անակնկալը Իտալիան պարտվեց Կոստա Ռիկային (0:1), վերջինս նաև փլեյ-օֆում հանդես գալու իրավունք ձեռք բերեց: Մյուս խաղում Լուիս Սուարեսի դուբլի շնորհիվ Ուրուգվայը հաղթեց (2:1) Անգլիային, որը նույնպես զրկվեց 1/8 եզրափակչի ուղեգրի համար պայքարելու շանսերից: Վերջին տուրի Անգլիա - Կոստա Ռիկա հանդիպումը ֆորմալ բնույթ է կրելու, իսկ Իտալիան ու Ուրուգվայը կատաղի պայքար կմղեն հաջորդ փուլ մտնելու համար:

E խմբում Ֆրանսիան երկրորդ անընդմեջ խոշոր հաշվով հաղթանակը տարավ, այս անգամ Շվեյցարիայի նկատմամբ (5:2), Էկվադորն էլ հաղթեց Հոնդուրասին (2:1): Վերջին տուրում Էկվադորին գերխոշոր հաշվով չպարտվելու պարագայում Ֆրանսիան դուրս կգա հաջորդ փուլ: Շվեյցարիան էլ ամենայն հավանականությամբ խնդիրներ չի ունենա Հոնդուրասի հետ պայքարում:

F խմբում Արգենտինան դժվարությամբ կոտրեց Իրանի դիմադրությունը (1:0), Նիգերիան էլ հաղթեց (1:0) հաղթեց Բոսնիային, վերջինս ժամանակից շուտ լքեց պայքարը, իսկ Արգենտինան 1/8 եզրափակչում է: Երրորդ տուրում միմյանց կհանդիպեն Արգենտինան ու Նիգերիան, Բոսնիան ու Իրանը:

Եվս երկու անակնկալ գրանցվեց G խմբում Գերմանիան չկարողացավ հաղթել Գանային (2:2), Պորտուգալիան` ԱՄՆ-ին (2:2): Թեև այս խմբում բոլոր թիմերն էլ պահպանում են հաջորդ փուլ դուրս գալու տեսական հնարավորությունները, եթե վերջին տուրում Գերմանիան ու ԱՄՆ-ը ոչ-ոքի խաղան հենց իրենք էլ 1/8 եզրափակչում հանդես գալու իրավունք կստանան, իսկ Պորտուգալիա - Գանա հանդիպումը ոչինչ չի որոշի:

H խմբից փլեյ-օֆի առաջին ուղեգրին արժանացավ Բելգիան, որը երկրորդ տուրում առավելության հասավ Ռուսաստանի նկատմամբ (1:0), մյուս խաղում Ալժիրը 4:2 հաշվով հաղթեց Հարավային Կորեային: Վերջին տուրում Ռուսաստանն ու Ալժիրը կատաղի պայքար կմղեն 1/8 եզրափակչում հայտնվելու համար, բայց Բելգիային հաղթելու դեպքում կորեացիներն կարող են խառնվել պայքարին:

A խումբ

B խումբ

C խումբ

D խումբ

E խումբ

F խումբ

G խումբ

H խումբ