Ուրուգվայը 1/8 եզրափակչում է. Իտալիան տուն է վերադառնում

Աշխարհի առաջնության խմբային փուլի վերջին տուրում Ուրուգվայի հավաքականը 1:0 հաշվով պարտության մատնեց Իտալիայի ընտրանուն և D խմբում զբաղեցնելով երկրորդ տեղը՝ 1/8 եզրափակչի ուղեգիր ձեռք բերեց, իսկ Իտալիան ավարտեց ելույթները Մունդիալ 2014-ում:

Չափազանց լարված ու անհետաքրքիր առաջին խաղակեսին հաջորդեց ոչ պակաս լարված ու անչափ գրավիչ երկրորդ խաղակեսը: Հանդիպման ամենաորոշիչ պահը, թերևս, Կլաուդիո Մարկիզիոյի հեռացումն էր: 59-րդ րոպեին իտալացին խաղադաշտի կենտրոնում շատ կոպիտ խաղաց Արվալո Ռիոսի հետ և մրցավարն առանց վարանելու գրպանից հանեց կարմիր քարտը, թեև շատ մրցավարներ կբարարվեին դեղին քարտով:

Թվային առավելություն ստանալուց հետո ուրուգվայցիներն ամբողջ թիմով նետվեցին գրոհների, որոնցից մեկի ժամանակ ուշագրավ դեպք գրանցվեց. Լուիս Սուարեսը կծեծ Ջորջիո Կելինիի ուսը, սակայն մրցավարը չնկատեց, այլապես թիմերի կազմերը կհավասարվեին:

Ինչևէ, Ուրուգվայի գրոհները շուտով տվեցին իրենց արդյունքը: 81-րդ րոպեին անկյունայինի խաղարկումից հետո Դիեգո Գոդինը բոլորից բարձր ցատկեց ու գլխի հարվածով գրավեց Ջանլուիջի Բուֆոնի դարպասը:

Վերջին րոպեներին իտալացիները գլխակորույս գրոհում էին, անգամ Բուֆոնն էր հայտնվել մրցակցի տուգանային հրապարակում, սակայն այդպես էլ չկարողացան խփել պատասխան գոլը:

Այս խմբի մյուս խաղում Կոստա Ռիկան ոչ-ոքի՝ 0:0 խաղաց Անգլիայի հետ: Այսպիսով, D խմբում առաջին տեղը գրավեց Կոստա Ռիկան՝ 7 մ., Ուրուգվայը երկրորդն է՝ 6 մ., Իտալիան 3 միավորով նախավերջինն է, Անգլիան 1 միավորով եզրափակեց խումբը: