Հունաստանը հաղթում է խելահեղ պայքարում

Աշխարհի առաջնության խմբային փուլի վերջին տուրում Հունաստանի հավաքականը 2:1 հաշվով պարտության մատնեց Կոտ դ'Իվուարի ընտրանուն և վաստակեց 1/8 եզրափակչի ուղեգիր:

Այս խաղում Կոտ դ'Իվուարին ոչ-ոքին էլ էր բավական հաջորդ փուլ անցնելու համար, իսկ Հունաստանին միայն ու միայն հաղթանակ էր անհրաժեշտ: Այս ամենը գիտակցելով հույներն առաջին իսկ րոպեներից նետվեցին գրոհների ու մեկը մյուսի հետևից վտանգավոր պահեր էին ստեղծում մրցակցի դարպասի մոտ: 42-րդ րոպեին ի վերջո Ֆերնանդու Սանթուշի սաներին հաջողվեց առաջ անցնել հաշվի մեջ. Անդրիաս Սամարիսը դարձավ գոլի հեղինակ:

Ընդմիջումից հետո արդեն աֆրիկացիներն էին ավելի շատ գրոհում, բայց հույների հակագրոհներն ավելի վտանգավոր էին: Այդուհանդերձ, 74-րդ րոպեին Ուիլֆրիդ Բոնին հավասարեցրեց հաշիվը: Հույները նորից նետվեցին գրոհների ու նորից վտանգավոր պահերը բազմաթիվ էին, բայց եզրափակիչ հարվածը չէր ստացվում և միայն մրցավարի ավելացրած ժամանակում Հունաստանին հաջողվեց հաղթանակ կորզել: Աֆրիկացիներն իրենց տուգանային հրապարակում կանոնները խախտեցին Գիորգիոս Սամարասի նկատմամբ, մրցավարը 11 մետրանոց նշանակեց, որն անվրեպ իրացրեց նույն Սամարսը:

Հունաստանի հավաքականը հաղթեց 2:1 հաշվով և 4 միավորով զբաղեցրեց C խմբի երկրորդ տեղը: 1/8 եզրափակչում հույներն ուժերը կչափեն D խմբի հաղթող Կոստա Ռիկայի ընտրանու հետ:  C խմբի մյուս խաղում առաջատարը` Կոլումբիայի ընտրանին 4:1 հաշվով պարտության մատնեց Ճապոնիային և 1/8 եզրափակչում կհանդիպի Ուրուգվայի հետ:

C խումբ