Civilnet
Աշխարհի առաջնության 1/8 եզրափակչում Հոլանդիայի հավաքականը կամային հաղթանակ տարավ Մեքսիկայի ընտրանու նկատմամբ և քառորդ եզրափակչի ուղեգիր ձեռք բերեց:
Եթե առաջին խաղակեսում երկու թիմերն էլ ավիլի շատ մտածում էին պաշտպանության մասին և այդպես լուրջ վտանգավոր պահեր չստեղծեցին միմյանց դարպասների մոտ, ապա ընդմիջումից հետո բոլորովին այլ ֆուտբոլի ականատես եղանք:
48-րդ րոպեին Ջովանի դոս Սանթոսը մոտ 25 մետրից կատարած տպավորիչ հարվածով առաջ մղեց Մեքսիկային: Բաց թողած գոլից հետո նարնջագույնները նետվեցին գրոհների, բայց երկար ժամանակ չէին կարողանում գրավել մինչ օրս Մունդիալ 2014-ի լավագույն դարպասապահ Գիլերմո Օչոայի պաշտպանած դարպասը: Գիլերմոն հերթական հիանալի խաղն անցկացրեց, բայց 88-րդ րոպեին Ուեսլի Սնեյդերի թնդանոթային հարվածից հետո Օչոան էլ էր անուժ:
Հաջողությունից ոգևորված հոլանդացիները չբավարարվեցին ձեռք բերածով և շարունակեցին շարժվել առաջ: Մրցավարի ավելացրած ժամանակում մեքսիկացիների լեգենդ Ռաֆայել Մարկեսը սեփական տուգանային հրապարակում կանոնները խախտեց Հոլանդիայի հավաքականի առաջատար Արիեն Ռոբենի հետ պայքարում և մրցավարը նշանակեց 11 մետրանոց: Կլաս Յան Հունտելաարը չվրիպեց 11 մետրանոց նշակետից՝ հաղթանակ պարգևելով իր թիմին:
Հոլանդիան քառորդ եզրափակչում է, որտեղ ուժերը կչափի Կոստա Ռիկա - Հունաստան խաղի հաղթողի հետ:
Պատմություններ
