Խաղի ժամանակ մտածում էի երեխաներիս մասին. Կեյլոր Նավաս

Աշխարհի առաջնության 1/8 եզրափակիչ Կոստա Ռիկա - Հունաստան (1:1, 5:3) հանդիպման լավագույն ֆուտբոլիստ ճանաչված Կոստա Ռիկայի հավաքականի դարպասապահ Կեյլոր Նավասը հայտարարել է, որ ամեն ինչ անում է, որ իր երեխաները հպարտանան իրենով:

Հիշեցնենք, որ խաղի հիմնական ժամանակն ավարտվեց ոչ-ոքի՝ 1:1 հաշվով, իսկ ետխաղյա 11 մետարանոց հարվածաշարի ժամանակ Նավասը ետ մղեց Թեոֆանիս Գեկասի հարվածն ու իր թիմին պատմության մեջ առաջին անգամ Աշխարհի առաջնության քառորդ եզրափակչի ուղեգիր պարգևեց:

«Սա այն է, ինչ ես ամբողջ կյանքում ցանկացել եմ անել: Միշտ փորձում եմ լինել լավ հայր ու լավ ընկեր, հատկապես ֆուտբոլի նման գեղեցիկ խաղում: Միշտ ջանում եմ երեխաներիս երջանկացնել: Երբ նրանք մեծանան ու ետ նայեն, կտեսնեն, որ իրենց հայրն իրենց պետության համար շատ կարևոր գործ է արել:

Բոլորից շնորհակալ եմ ջերմ խոսքերի համար: Շնորհակալ եմ նաև ընտանիքիս, որն ամենակարևորն է իմ կյանքում»,- Նավասի խոսքն է մեջբերում Eurosport-ը: