Civilnet
Մունդիալ 2014-ի 1/8 եզրափակչում Ֆրանսիայի հավաքականը 2:0 հաշվով պարտության մատնեց Նիգերիայի ընտրանուն և նվաճեց քառորդ եզրափակչի ուղեգիր:
Առաջին խաղակեսն անցավ հավասար պայքարում: Ֆրանսիացիները որոշակի խաղային առավելություն ունեին, բայց գնդակին ավելի շատ տիրում էին աֆրիկացիները: Մինչև ընդմիջում թիմերից և ոչ մեկը ռեալ գոլային պահ չունեցավ:
Երկրորդ խաղակեսի սկզբնամասը շատ նման նման էր առաջինին, սակայն 65-րդ րոպեից սկսած Դիդիե Դեշամի սաներն ուժեղացրին ճնշումը և մի քանի վտանգավոր գրոհ կազմակերպեցին:
77-րդ րոպեին Յոհան Կաբայի հարվածից հետո գնդակը ետ մղվեց դարպասաձողից, իսկ 2 րոպե անց Պոլ Պոգբան գլխի հարվածով առաջ մղեց Ֆրանսիային: Դե Շամի սաների հաջորդ իսկ գրոհը նույնպես կարող էր գոլով ավարտվել, բայց Նիգերիացիների դարպասապահ Վինսենտ Էնյաման հրաշալի ցատկով փրկեց իր թիմին: Մրցավարի ավելացրած ժամանակում աֆրիկացիները ևս մեկ գոլ ընդունեցին սեփական դարպասը. ինքնագոլի հեղինակ դարձավ Նիգերիայի ընտրանու ավագ Ժոզեֆ Յոբոն:
Ֆրանսիան հաղթեց 2:0 հաշվով և մտավ քառորդ եզրափակիչ, որտեղ ուժերը կչափի Գերմանիա - Ալժիր հանդիպման հաղթողի հետ:
Պատմություններ
