Civilnet
Աշխարհի առաջնության վերջին 1/8 եզրափակիչ խաղում Բելգիայի հավաքականը լրացուցիչ ժամանակում 2:1 հաշվով պարտության մատնեց ԱՄՆ-ի ընտրանուն և նվաճեց քառորդ եզրափակչի ուղեգիր:
Բելգիացիներն ամբողջ հանդիպման ընթացքում առավելություն ունեին և կարող էին հաղթել հիմնական ժամանակում, բայց ամերիկացիների դարպասապահ Թիմ Հովարդը մեկը մյուսի հետևից անհավանական գնդակներ էր որսում ու ետ մղում: Այդուհանդերձ, ամերիկացիները նույնպես դարպասը գրավելու մի քանի գերազանց պահ կորցրին:
Եթե լրացուցիչ ժամանակի առաջին 15 րոպեներն անցան Բելգիայի հավաքականի թելադրանքով և նրանք 2 գոլ խփեցին, մեկական անգամ աչքի ընկան Քևին դե Բրույնեն (93 ր.) և Ռոմելու Լուկակուն (105 ր.), ապա լրացուցիչ երկրորդ խաղակեսում մենք տեսանք թե ինչի է ընդունակ ԱՄՆ-ի ընտրանին: Վերջին 15 րոպեներին խաղադաշտում մեկ թիմ էր՝ ԱՄՆ-ի հավաքականը: 107-րդ րոպեին Ջուլիան Գրինին հաջողվեց կրճատել հաշվի տարբերությունը: Այդուհետ բելգիացիները նվազագույնը 4 անգամ հրաշքով փրկվեցին:
Արդյունքում Բելգիան հաղթեց 2:1 հաշվով և նվաճեց քառորդ եզրափակչի վերջին ուղեգիրը: Կիսաեզրափակչում խաղալու համար բելգիացիներն ուժերը կչափեն Արգենտինայի հետ:
Փաստորեն բոլոր 1/8 եզրափակիչներում հաղթեցին ֆավորիտները՝ իրենց խմբերից առաջին տեղով փլեյ-օֆ փուլ դուրս եկած հավաքականները:
Պատմություններ
