Civilnet
Մունդիալ 2014-ի առաջին քառորդ եզրափակչում Գերմանիայի հավաքականը նվազագույն հաշվով պարտության մատնեց Ֆրանսիայի ընտրանուն և վաստակեց կիսաեզրափակչի ուղեգիր:
Հանդիպումը լավ մեկնարկեց գերմանացիների համար. 13-րդ րոպեին Թոնի Կրոսի փոխանցումից հետո Մաթս Հյումելսը մոտ տարածությունից գլխի հարվածով գնդակն ուղարկեց Ուգո Լյորիսի դարպասը: Ֆրանսիացիներից բավական երկար ժամանակ պահանջվեց իրենց խաղը համակարգելու ու առաջին վտանգավոր գրոհը կազմակերպելու համար: 33-րդ րոպեին Մատյո Վալբուենան ձախ եզրով ներխուժեց տուգանային հրապարակ և լավ հարված կատարեց, բայց Նոյերը փրկեց իր թիմին:
Ընդմիջումից հետո Դիդիե Դեշամի սաներն ավելի ակտիվ էին, բայց գերմանացիները շարունակում էին գերազանց պաշտպանվել և հակագրոհելու առիթը բաց չէին թողնում:
70-րդ րոպեից սկսած ֆրանսիացիներն ուժեղացրին ճնշումը և մի քանի սուր գրոհ անցկացրին, որոնցից մեկի ժամանակ Մաթս Հյումելսը կարող էր այս խաղում իր երկրորդ գոլը խփել, բայց այս անգամ սեփական դարպասը: Այդուհանդերձ, գնդակը փոքր շեղությամբ անցավ դարպասաձողի կողքով, իսկ 80-րդ րոպեին արդեն Յոահիմ Լյովի սաները կարող էին կրկնապատկել հաշիվը. Անդրե Շուրլեն չափազանց լավ դիրքում ստացավ գնդակը, բայց հարվածեց ուղիղ Լյորիսի վրա: 7 րոպե անց Շուրլեն ևս մեկ հիանալի հնարավորություն ստացավ, սակայն այս անգամ էլ հարվածեց ուղիղ պաշտպանի վրա:
Վերջին րոպեներին գերմանացիներն ընդամնեը մեկ հնարավորություն տվեցին մրցակցին, բայց մրցավարի ավելացրած ժամանակում Նոյերը ետ մղեց Բենզեմայի հարվածը: Գերմանիան կիսաեզրափակչում է, որտեղ ուժերը կչափի Բրազիլիա - Կոլումբիա հանդիպման հաղթողի հետ:
Պատմություններ
