Civilnet
ՄԱԿ-ի գլխավոր քարտուղար Բան Կի Մունը կիսում է խոր մտահոգությունը, որը հայտել են ԵԱՀԿ Մինսկի խմբի համանախագահներն ու միջազգային մյուս գործընկերները շփման գծի և հայ-ադրբեջանական սահմանի երկայնքով լարվածության աճի ու բռնության դրսևորման կապակցությամբ։
Հայտարարությունում, որով Բան Կի Մունի անունից օգոստոսի 4-ին հանդես է եկել նրա մամուլի քարտուղարը, ասված է, որ ՄԱԿ-ի ղեկավարը բոլոր կողմերին կոչ է անում հարգել զինանդադարի մասին համաձայնագիրը, զերծ մնալ հետագա բռնությունից և դրսևորել լարվածության անհապաղ թուլացման ու երկխոսությունը շարունակելու պատրաստակամություն՝ արագ և խաղաղ քաղաքական կարգավորման հասնելու նպատակով։
«Գլխավոր քարտուղարը իր լիակատար աջակցությունն է հայտնում ԵԱՀԿ Մինսկի խմբի և բոլոր նրանց ջանքերին, ովքեր միջոցառումներ են ձեռնարկում այս վտանգավոր իրադրության լուծման համար և ձգտում են հասնել ղարաբաղյան հակամարտության խաղաղ կարգավորմանը»,- ասված է հայտարարությունում։
Վերջին մի քանի օրերին հայ-ադրբեջանական շփման գծի ամբողջ երկայնքով իրավիճակը կտրուկ սրվել է։ Հակառակորդը դիվերսիոն ներթափանցման փորձեր է ձեռնարկել ռազմաճակատի տարբեր հատվածներում, ինչը բոլոր դեպքերում կասեցվել է: Սաստկացել է նաև Տավուշի մարզի սահմանամերձ գյուղերի գնդակոծությունը ադրբեջանական կողմից։
Շփման գծում տիրող լարված իրավիճակի կապակցությամբ ավելի վաղ իրենց մտահոգությունն էին հայտնել ԵԱՀԿ-ն, Ռուսաստանը, ԱՄՆ-ը, Ֆրանսիան, Եվրամիությունը։
Պատմություններ
