Ադրբեջանը հայտարարում է ևս մեկ զինվորի մահվան մասին

Օգոստոսի 6-ին Ադրբեջանը հայտարարել է ևս մեկ զինծառայողի մահվան մասին: Ըստ ադրբեջանական APA գործակալության զինվորը մահացել է «շփման գծում՝ հրազենային վիրավորումից»: Գործակալության հաղորդմամբ՝ «կոնկրետ ինչ հանգամանքներում է նա վիրավարվել, հայտնի չէ»:

Օգոստոսի 5-ին Ադրբեջանը հայտարարել էր ևս երկու զինծառայողի մահվան մասին: Նրանք, ըստ Ադրբեջանի պաշտպանության նախարարության, մահացել են զորամասերում՝ անզգույշ կրակոցի հետևանքով:

Վերջին մի քանի օրերին հայ-ադրբեջանական շփման գծի ամբողջ երկայնքով իրավիճակը կտրուկ սրվել է։ Հակառակորդը դիվերսիոն ներթափանցման փորձեր է ձեռնարկել ռազմաճակատի տարբեր հատվածներում, ինչը բոլոր դեպքերում կասեցվել է: Սաստկացել է նաև Տավուշի մարզի սահմանամերձ գյուղերի գնդակոծությունը ադրբեջանական կողմից:

Լեռնային Ղարաբաղի պաշտպանության նախարարությունը հայտարարել է, որ ադրբեջանական բանակը հուլիսի 28-ից օգոստոսի 2-ն ընկած ժամանակահատվածում հակամարտ զորքերի շփման գծի տարբեր հատվածներում տվել է առնվազն 25 զոհ և 30-ից ավելի վիրավոր: