ՀԱԿ-ը վարչապետի հետ չի մեկնի շփման գիծ

Հայ ազգային կոնգրես կուսակցությունը օգոստոսի 8-ին հանդես է եկել հայտարարությամբ, որում անդրադառնում է վարչապետ Հովիկ Աբրահամյանի` խմբակցությունների ղեկավարներին ուղղված հրավերին` միասնական պատվիրակությամբ մեկնելու շփման գիծ:

Հայտարարությունում մասնավորապես ասված է. «Օգոստոսի 4-ին Ազգային ժողովի խմբակցությունների հետ պաշտպանության նախարար Սեյրան Օհանյանի նախաձեռնությամբ կայացած հանդիպման ժամանակ քննարկվեց շփման գծում Ադրբեջանի զինված ուժերի կողմից կատարված լայնածավալ հարձակումների հետևանքով ստեղծված լարված իրավիճակը: Քննարկման արդյունքում խմբակցությունները որոշում կայացրին հանդես գալ հայոց բանակին և զինվորներին աջակցելու միասնական հայտարարությամբ, ինչպես նաև որոշվեց խմբակցությունների ղեկավարների համատեղ այցով մեկնել ճակատի գիծ և հանդիպումներ անցկացնել հայրենիքի պաշտպանության գործով զբաղված զինվորների և հրամանատարական կազմի հետ: Հայաստանի քաղաքական ուժերի միջև կայացած այս աննախադեպ համաձայնության նպատակն էր՝ Հայաստանի և Լեռնային Ղարաբաղի համար վտանգի պահին բանակի շուրջ բոլոր քաղաքական ուժերի համախմբվածության ցուցադրումը ագրեսորին:

Օգոստոսի 5-ին տարածվեց վեց խորհրդարանական խմբակցությունների համատեղ հայտարարությունը: Թվում էր, թե նույնքան անշեղորեն կիրականացվի նաև դեպի շփման գիծ կատարվելիք այցերի մասին ձեռք բերված համաձայնությունը, և որևէ քաղաքական ուժ չի փորձի միակողմանիորեն այն խախտել՝ ստորադասելով ազգային շահերը նեղանձնական կամ նեղկուսակցական քարոզչական դիվիդենտներ քաղելու  էժանագին նպատակին: Օգոստոսի 7-ին, սակայն, Ազգային ժողովի ղեկավարությունը տեղեկացրեց Հայ ազգային կոնգրես խմբակցությանը, որ ի փոփոխություն ձեռք բերված պայմանավորվածության՝ տեղի կունենա ՀՀ վարչապետ Հովիկ Աբրահամյանի այցը դեպի շփման գիծ և ԱԺ խմբակցությունների ղեկավարները հրավիրվում են մաս կազմել նրա պատվիրակությանը:

Ակնհայտ է, որ Հովիկ Աբրահամյանը, տեղեկանալով ԱԺ խմբակցությունների միջև օգոստոսի 4-ին ձեռք բերված համաձայնության մասին, որոշել է օգտագործել այն սեփական անձի գովազդման նպատակով, ինչպես նաև, կցելով խորհրդարանական պատվիրակությունն իրեն, փոխարինել ազգային շահերի շուրջ համախմբան խորհրդանիշը՝ իշխանության շուրջ համախմբման պատրանքով: Հովիկ Աբրահամյանի նման գործելակերպը ուղղված է, ըստ էության,  պաշտպանության նախարար Սեյրան Օհանյանի նախաձեռնության և ձեռք բերված համաձայնության տապալմանը:

Հայ ազգային կոնգրեսը հետևաբար մերժում է Հովիկ Աբրահամյանի քարոզարշավին մասնակցելու հրավերը և վերահաստատում իր պատրաստակամությունը իրականացնելու Սեյրան Օհանյանի հետ օգոստոսի 4-ին ձեռք բերված պայմանավորվածությունները՝ զորամասեր և շփման գիծ կատարվելիք ինչպես համատեղ, այնպես էլ առանձին այցերի վերաբերյալ»:

Վերջին մեկ շաբաթվա ընթացքում հայ-ադրբեջանական շփման գծի ամբողջ երկայնքով իրավիճակը կտրուկ սրվել է: Շփման գծում տիրող իրավիճակի կապակցությամբ իրենց մտահոգությունն են հայտնել ԵԱՀԿ-ն, Ռուսաստանը, ԱՄՆ-ը, Ֆրանսիան, Մեծ Բրիտանիան, Եվրամիությունը, ՄԱԿ-ը։