Civilnet
Ադրբեջանի ղեկավարությունը քաջատեղյակ է Հայաստանի հնարավորությունների մասին, օգոստոսի 11-ին «Արմնյուզ» հեռուստաալիքի «Բանաձև» հաղորդաշարի շրջանակում ասաց նախագահ Սերժ Սարգսյանը` անդրադառնալով Ադրբեջանի բարձրագույն ղեկավարության սպառնալիքներին` ուղղված Հայաստանի դեմ:
«Այո, և դա ես առանց որևէ մտավախության եմ ասում, Ադրբեջանի զինված ուժերը Նախիջևանից կարող են «հասնել» նաև Երևանի սահմաններին, եթե ռազմական գործողություններ սկսվեն: Բայց այդպիսի բաներն անպատիժ երբեք չեն մնում, և Ադրբեջանի ղեկավարությունը շատ լավ գիտի, թե ինչ կարողություններ ու հնարավորություններ ունեն հայկական զինված ուժերը: Նրանք շատ լավ գիտեն, որ մենք ունենք բալիստիկ հրթիռներ, որոնց գործողության շառավիղը 300 կմ-ից ավելի է, և որոնք շատ կարճ ժամանակում ցանկացած ծաղկուն բնակավայր կարող են վերածել այնպիսի ավերակների, ինչպիսին հիմա Աղդամի ավերակներն են»,- ասաց նախագահը` նշելով, որ դա արդեն Ադրբեջանի ընտրության հարցն է:
Սարգսյանը կոչ արեց Ադրբեջանին իր պատասխանատվության մասին մտածել`Հայաստանի ոչ սահմանամերձ բնակավայրերը որպես թիրախ ընտրելով: Անդրադառնալով շփման գծի լարվածության հետևանքով երկու կողմերի կորուստներին` Սերժ Սարգսյանը տեղեկացրեց, որ ինքը հանձնարարել է պաշտպանության նախարարին` հատուկ զբաղվել և հրապարակել մեր մամուլում՝ ինչպես մեր զոհերի անուն-ազգանունները, այնպես էլ ադրբեջանական մահացած զինծառայողների անուն-ազգանունները, «որպեսզի մարդիկ առարկայորեն տեսնեն̀ ով է ավելի շատ կորցրել և քանի անգամ»:
«Դրա նպատակն այն չի, որ մենք ուրախանում ենք: Անձամբ ես մեծ ուրախություն չեմ ապրում ադրբեջանցիների շատ կորուստներով: Ես հպարտության մեծ զգացումներ եմ ունենում մեր տղաների գործողությունների համար: Ինձ համար ամենակարևորն այն է, որ մենք կորուստ չունենանք, կամ քիչ ունենանք: Իսկ թե նրանք ինչքան կորուստ կունենան, ինձ ամենաշատ հետաքրքրող հարցը չէ: Բայց իրենց հասարակությունը պետք է իմանա, թե ինչի է հասցնում այդ ոչ լուրջ վերաբերմունքը պատերազմի կամ միջադեպերի նկատմամբ»,- ասաց Սերժ Սարգսյանը:
Վերջին երկու շաբաթներին հայ-ադրբեջանական սահմանի և շփման գծի ամբողջ երկայնքով մի շարք բախումներ էին եղել, որոնց արդյունքում շուրջ երեք տասնյակ զոհ է եղել երկու կողմից, առավելապես՝ ադրբեջանական:
Պատմություններ
