Առողջ սննդի յոթ համակցություն

Նորություն չէ, որ կաթը նպաստում է ոսկորների ամրությանը, իսկ գազարը լավացնում տեսողությունը: Բաց դու մի բան չգիտես՝ որոշակի սննդամթերքներ միասին ուտելով, դու կարող ես շատ ավելի լավ պայքարել հիվանդությունների դեմ: Ներկայացնում ենք մի քանի տարբերակ:

1․ Կալցիում + ինուլին = առողջ ստամոքս, ուժեղ ոսկորներ

Եթե խնդիրներ ունես մարսողության հետ, պետք է իմանաս ինուլինի մասին, որն օգնում է մարսողական համակարգում «լավ» բակտերիաների ճիշտ քանակի պահպանմանը: Ինուլինը նաև օգտակար է ոսկորներին, քանի որ նպաստում է կալցիումի յուրացմանը: Այս հրաշալի սննդանյութը պարունակվում է նաև բնության բարիքների մեջ:

Ինուլինի լավ աղբյուր են արտիշոկները, սոխը, սխտորը, բանանը, ամբողջական ցորենի ալյուրը և այլն:

Կալցիումի լավ աղբյուր են կաթը, յոգուրտը, պանիրը, բրոկոլին, կաղամբը, սաղմոնը, նուշը, բրինձը և այլն:

Մի քանի տարբերակ

• Վարսակի փաթիլների շիլա՝ մեջը կտրտած բանան
• Գրիլ արած ծնեբեկ՝ պարմեզան պանրով:

2. Կալցիում + վիտամին D = ուժեղ ոսկորներ

Մեր օրգանիզմը բավական շատ D վիտամինի կարիք ունի կալցիումի յուրացման համար:
Վիտամին D պարունակվում է սաղմոնի, թունայի, ձվի դեղնուցի, նուշի և այլնի մեջ:
Հետաքրքիր համադրություններ են՝

• Գրիլ արված սաղմոնը կաղամբով
• Օմլետը բրոկոլիով և պանրով
• Թունա ձուկը ցածր յուղայնությամբ պանրով և ամբողջական ցորենի հացով:

3․ Վիտամին E + վիտամին C = սուր տեսողություն

Ուզո՞ւմ ես սուր տեսողություն ունենալ: Ընդունիր E վիտամին, ինչն օգնում է կանխարգելել կուրության գլխավոր պատճառներից մեկը՝ մակուլյար դեգեներացիան, համատեղելով այն C վիտամինի հետ:

Վիտամին E պարունակվում է նուշի, գետնանուշի, արևածաղկի և այլնի մեջ:

C վիտամինի հրաշալի աղբյուր են ցիտրուսային մրգերը, կիվին, բուլղարական պղպեղը, բրոկոլին, լոլիկը, ելակը, կարտոֆիլը և այլն:

Կարելի է.

• Գետնանուշի կարագ քսել հացի վրա՝ ավելացնելով ելակներ

• Աղցանի մեջ ավելացնել մանդարին և նուշ:

4. Երկաթ + վիտամին C = ավելի շատ էներգիա

Եթե անընդհատ հոգնածություն ես զգում, հնարավոր է, որ երկաթի պարունակությունն արյանդ մեջ պակաս լինի: Երկաթն օգնում է թթվածինը մատակարարել մկաններին, ուղեղին և ամբողջ օրգանիզմին: Իսկ  հիվանդության դեմ պայքարող C վիտամինն օգտակար է ատամների, սրտի և մաշկի  համար, օգնում է երկաթի յուրացմանը:

Երկաթ պարունակվում է սպանախի, վարսակի փաթիլների, սև և կարմիր լոբիների, կարմիր մսի, ձվի մեջ:

Իսկ C վիտամին պարունակվում է ցիտրուսների, պղպեղների, կիվիի, ելակի և այլնի մեջ:

Կարելի է համատեղել հետևյալ կերպ.

• Սպանախով  և նարնջով աղցան

• Վարսակի փաթիլների շիլա ելակներով:

5. K վիտամին + ճարպեր = առողջ ոսկորներ և սիրտ

Ճարպերն օգտակար են միայն, եթե ճիշտ ճարպեր ես օգտագործում: «Լավ» ճարպերը շատ օգտակար են՝ նվազեցնում են «վատ» խոլեստերինը և օգնում են, օրինակ, K վիտամինի յուրացմանը: Իսկ K վիտամինն անհրաժեշտ է ոսկորների ամրացման և արյան մակարդման համար:

K վիտամինի աղբյուր են սպանախը, բրոկոլին, կաղամբը, բրուսելյան կաղամբը և այլն:

Ճարպերի լավ աղբյուր են ցանկացած տեսակի ընկուզեղենը, ձեթերը՝ ներառյալ զեյթունինը, ավոկադոն և այլն:

6. Բետա կարոտին + ճարպեր = փայլուն մաշկ

Մոռացիր ծերացման դեմ պայքարող բոլոր քսուկները: Բետա կարոտինը, որի յուրացման համար անհրաժեշտ են ճարպեր, վերածվում է A վիտամինի, ինչն էլ մաշկին տալիս է երիտասարդական փայլ: Վիտամին A-ն օրգանիզմում կենտրոնական դեր ունի առողջ իմունիտետի և վերականգնողական համակարգերի համար, բայց առանց «լավ» ճարպերի, այն չի յուրացվի:

Բետա կարոտինի լավ աղբյուր են գազարը, ծիրանը, քաղցր կարտոֆիլը, պապայան, սպանախը և այլն:

Ճարպերի լավ աղբյուր են ամեն տեսակի ընկուզեղենը, արևածաղկի սերմերը, զեյթունի և այլ ձեթերը, ավոկադոն:

Համադրության օրինակներ.

• Քաղցր կարտոֆիլը ցողել զեյթունի ձեթով և եփել ջեռոցում

• Գազարի հյութ սերուցքով:

7. Ցինկ + ծծմբային բաղադրիչներ = ուժեղ իմունային համակարգ

Ուշադրություն բոլոր սոխ և սխտոր սիրողներին: Այս 2  կծու բույսերն ավելին են անում, քան ուղղակի ուտեստին համ տալը: Դրանց մեջ պարունակվող ծծումբը նպաստում է ցինկի յուրացմանը:

Ցինկի լավ աղբյուր են բոլոր ամբողջական հացահատիկները՝ ներառյալ դարչնագույն բրինձը և ամբողջական հացահատիկից հացերը:

Ուտեստներ․

• Դարչնագույն բրինձ՝ կարամելացված սոխով

• Ամբողջական ցորենից հացի կտորի վրա քսել թեթև սերուցքային պանիր՝ վրան ավելացնելով մի քիչ կտրտած սոխ: