ՏՏ Համաշխարհային կոնգրեսն 2019թ. կանցկացվի Հայաստանում

Տեղեկատվական տեխնոլոգիաների Համաշխարհային կոնգրեսը (WCIT) 2019թ.  առաջին անգամ կանցկացվի Հայաստանում, հաղորդում են «Ինֆորմացիոն տեխնոլոգիաների ձեռնարկությունների միության» մամուլի ծառայությունից: Ըստ միության գործադիր տնօրեն Կարեն Վարդանյանի՝ միությունը նպատակադրվել էր տեղեկատվական տեխնոլոգիաների ոլորտի ամենամեծ և կարևոր միջոցառումն անցկացնել Հայաստանում և առաջարկով հանդես էր եկել Համաշխարհային Տեղեկատվական տեխնոլոգիաների և ծառայությունների ալյանսին (WITSA): Առաջարկը քննարկվել է սեպտեմբերի 29-ին Մեքսիկայի Քվադալահարա քաղաքում կայացած WCIT 2014 շրջանակներում և որոշվել, որ 2019թ. կոնգրեսը կանցկացվի Հայաստանում: Կոնգրեսի շնորհիվ Հայաստանը կդիրքավորվի աշխարհի տեղեկատավական տեխնոլոգիաների քարտեզի վրա, լայն տարածում կգտնի ‹‹Արտադրված է Հայաստանում›› բրենդը, ինչպես նաև Համաշխարհային ՏՏ կոնգրեսը հնարավորություն կընձեռի հայկական տեխնոլոգիական ընկերություններին ստեղծելու արդյունավետ միջազգային կապեր ու ձեռք բերել նոր գործընկերներ: WCIT-ը տեղեկատվական և հեռահաղորդակցական ոլորտի ամենահեղինակավոր համաժողովն է, որի հիմնական նպատակն է քննարկել ոլորտի հրատապ հարցերը և մարտահրավերները, ցույց տալ իրավական, քաղաքական և տնտեսական գործընթացների ազդեցությունը տեխնոլոգիական բիզնես մոդելի վրա: Համաշխարհային կոնգրեսին մասնակցում են ոլորտի ընկերությունների ղեկավարներ, ձեռներեցներ և բիզնես լիդերներ, պետական-քաղաքական այրեր, գիտական-ակադեմիական շրջանակների ներկայացուցիչներ և այլք: Համաժողովի ընթացքում կազմակերպվում են հանդիպումներ, անցկացվում է ցուցահանդես, որի ընթացքում յուրաքանչյուր երկիր ներկայացնում է իր երկրի տեխնոլոգիական լուծումները: Ինֆորմացիոն տեխնոլոգիաների ձեռնարկությունների միությունը հիմնադրվել է 2000թ.` որպես Հայաստանում գործող տեղեկատվական և հեռահաղորդակցական տեխնոլոգիաների ոլորտի ձեռնարկությունների բիզնես ասոցիացիա: Այն ստեղծվել է ոլորտի ձեռնարկությունների շահերի պաշտպանության և բիզնեսի խթանման նպատակով: