Մարադոնան կարող է գլխավորել Պաղեստինի ազգային հավաքականը

Անցյալում արգենտինացի հայտնի ֆուտբոլիստ Դիեգո Մարադոնան շուտով կարող է վերադառնալ մարզչական գործունեության։ 53-ամյա մասնագետը բանակցություն է վարում Պաղեստինի ֆուտբոլի ֆեդերացիայի հետ այդ երկրի ազգային հավաքականը գլխավորելու համար։ Այս մասին գրում է The Times of Israel-ը։

Աղբյուրի համաձայն՝ բանակցությունները բավականին առաջ են գնացել։ Նշենք, որ ներկայում Պաղեստինը ՖԻՖԱ-ի դասակարգման աղյուսակում զբաղեցնում է 102-րդ հորիզոնականը և հունվարին կմասնակցի Ասիայի գավաթի խաղարկությանը, որը կայանալու է Ավստրալիայում։

Հիշեցնենք, որ ավելի վաղ Մարադոնան գլխավորել է Արգենտինայի ազգային հավաքականն ու «Ալ-Վասլ» թիմը։