Civilnet
Թուրքիայի խորհրդարանում ներկայացված «Ազգայնական շարժում» կուսակցության (ԱՇԿ) պատգամավոր Նեվզաթ Քորքմազը հարցում է ուղարկել ներքին գործերի նախարար Էֆքան Ալային` պարզելու համար, թե Սիրիայից եկող փախստականների մեջ որքան է հայերի թիվը:
Քորքմազը հետաքրքրվել է, թե արդյոք սպառնալիք չէ՞ Թուրքիայի համար ISIS («Իսլամական պետություն» - ՍիվիլՆեթ) ահաբեկչական կազմակերպության հարձակման հետևանքով Սիրիայից Թուրքիա եկող փախստականների հոսքը: Այնուհետև նա իր հարցը ձևակերպել է հետևյալ կերպ. «Թուրքիա ժամանող փախստականների մեջ որքա՞ն է 1915թ. տեղահանության ժամանակ Թուրքիայից վտարված հայերի թիվը, և արդյոք այս գաղթը կարելի՞ է համարել սփյուռքի քայլերից մեկը (այսպես կոչված) Հայոց ցեղասպանության 100-րդ տարելիցին ընդառաջ»:
ԱՇԿ-ի պատգամավորի վերոնշյալ հարցը մեծ աղմուկ էր բարձրացրել համացանցում: «Ակօսի» հետ զրույցում Նեվզաթ Քորքմազը պարզաբանել է, որ ԱՇԿ-ն որևէ խնդիր չունի ազգային ու կրոնական այն փոքրամասնությունների հետ, որոնք վտանգ չեն ներկայացնում պետությանը: Նա որպես իր ասածի ապացույց է նշել է հանգամանքը, որ տեղական ինքնակառավարման մարմինների ընտրությունների ժամանակ Բաքըրքոյում ԱՇԿ-ի կողմից առաջադրվել էր ազգությամբ հայ Ներսես Երամյանը և Էլմաս Կիրակոսը: Թուրքիայի խորհրդարանի պատգամավորը հավելել է, որ «հայերն, իհարկե, կարող են Թուրքիա գալ, սակայն հնարավոր է՝ լինեն այնպիսիք, որ ունենան վատ մտադրություն կամ ծրագրեր»:
«Թե ի՞նչ ծրագրեր ունեն նրանք, պետք է պարզի ներքին գործերի նախարարությունը»,- ասել է թուրք պատգամավորը:
Պատմություններ
