Թուրքիայում դեմ են Ցեղասպանությունը ճանաչած Պապի այցին
Civilnet
Ցուցարարները բողոքել են նաև Իսրայելի գործողությունների դեմ
Թուրքական «Երջանկություն» կուսակցությունը դեմ է Հռոմի պապ Ֆրանցիսկոսի՝ Թուրքիա նախատեսվող այցին, հաղորդում է թուրքական Haberler կայքը: Կուսակցության Էրզրումի կանանց թևը Լալա փաշա մզկիթի առջև ցույց է կազմակերպել` բողոքելով մուսուլմանների նկատմամբ Իսրայելի վարած քաղաքականության դեմ, նաև անդրադարձել Կաթոլիկ եկեղեցու առաջնորդի առաջիկա այցին Թուրքիա:
Իսլամամետ և պահպանողական այս կուսակցության կանանց թևը քննադատել է Թուրքիայի նախագահ Ռեջեփ Թայիփ Էրդողանին, որի հատուկ հրավերով է կաթոլիկ աշխարհի առաջնորդը նոյեմբերի 28-30-ն այցելելու Թուրքիա:
«Մեզ խորապես վիրավորել է այն, որ Էրդողանի՝ Պապին ուղղված հրավերը լի է նրա հասցեին գովեստի խոսքերով: Մենք չենք ցանկանում մեր երկրում տեսնել Հռոմի պապին, որը ճանաչում է այսպես կոչված՝ Հայոց ցեղասպանությունը: Թե որքանով է սխալ Պապին Թուրքիա հրավիրելը՝ ցույց կտան պատմությունն ու աշխարհի իսլամական համայնքը»,- հայտարարել է կուսակցության Էրզրումի կանանց թևի առաջնորդ Էլիֆ Քումբասարը:
Ցուցարարները նաև հակաիսրայելական հայտարարություններ են հնչեցրել և կոչ արել բոյկոտել իսրայելական ապրանքները Թուրքիայում։:
Պատմություններ
