Դավութօղլուն հարկ է համարել արտահայտվել Դինքի և 1915-ի մասին
Civilnet
Թուրքիայի վարչապետ Ահմեդ Դավութօղլուն Հրանտ Դինքի մահվան 8-րդ տարելիցի կապակցությամբ հանդես է եկել ցավակցական ուղերձով՝ անդրադառնալով նաև Հայաստան-Թուրքիա հարաբերություններին:
Դավութօղլուն Հրանտ Դինքին բնորոշել է որպես մի մտավորական, որը ճանապարհ ու մեթոդներ էր փնտրում Հայաստանի և Թուրքիայի միջև ընդհանուր ապագա կառուցելու համար: Այդ իսկ պատճառով Թուրքիայի վարչապետն առիթը բաց չի թողել, ցավակցությունից զատ, դիմելու ամբողջ հայ ժողովրդին:
Նա ասել է, որ պատերազմի պայմաններում հարկադրված տեղափոխության քաղաքականության հետևանքով 1915թ. հակամարդկային իրավիճակ է առաջացել, որի մասին Թուրքիան նախկինում ևս հայտարարել է, և որ իրենք կիսում են հայ ժողովրդի ցավը: Չօգտագործելով «ցեղասպանություն» եզրը և հարցը այսքանով փակված համարելով՝ Թուրքիայի վարչապետը կարևորել է երկու ժողովուրդների միջև թշնամության վերացումը:
Ըստ Դավութօղլուի՝ հայերը, «ժամանակը 1915-ում սառեցրած մեծ տրավման անցյալում թողնելու համար, պետք է սկսեն ջարդել տաբուները», իսկ Թուրքիան իր հերթին փորձել է հաստատել լավ հարաբերություններ, ինչի ամենակարևոր ապացույցն անցած տարի վարչապետ Էրդողանի ապրիլ քսանչորսյան ուղերձն էր:
Դավութօղլուն շեշտել է, որ վերստին բարեկամական հարաբերություններ հաստատելու իրենց ցանկությունն անկեղծ է և ավելացրել. «Մեր հորիզոնը խաղաղությունն ու բարեկամությունն են»:
Պատմություններ
