Ապրիլը` Գլենդելում Հայոց ցեղասպանության հիշատակման ամիս
Civilnet
Գլենդելի քաղաքային խորհուրդը՝ քաղաքապետ Զարեհ Սինանյանի գլխավարությամբ, մարտի 10-ին հռչակագիր է ընդունել՝ ապրիլ ամիսը հայտարարելով «Հայոց ցեղասպանության հիշատակման ամիս», հաղորդում է Asbarez-ը:
Խորհրդի կողմից նաև բանաձև է ընդունվել, որով խորհուրդը պահանջում է, որ Գլենդելի դպրոցներում, թանգարաններում ու գրադարաններում Ցեղասպանության վերաբերյալ համապատասխան տեղեկատվություն ներկայացվի: Բանաձևը ԱՄՆ նախագահին և Կոնգրեսին ուղղված կոչ է պարունակում՝ ճանաչելու Հայոց ցեղասպանությունը, ինչպես նաև ջանք չխնայելու հայ-թուրքական հարաբերությունների կարգավորմանն աջակցելու, Թուրքիայի իշխանություններին օգնելու՝ Ցեղասպանության փաստն ամբողջովին ընդունելու ու հայ ժողովրդին փոխհատուցելու հարցերում:
Բացի այդ՝ խորհրդի անդամները հորդորել են Վաշինգտոնի իրենց պաշտոնակիցներին՝ հետևելու իրենց օրինակին:
Բանաձևի կրկնօրինակները փոխանցվելու են ԱՄՆ-ի նախագահին, փոխնախագահին, Ներկայացուցիչների պալատի խոսնակին, ԱՄՆ-ում Թուրքիայի դեսպանին և մի շարք այլ բարձրաստիճան պաշտոնյաների:
Պատմություններ
