«Այլևս երբեք…» ծրագիրը ներկայացվել է Սոֆիայի կինոփառատոնում

«Ոսկե ծիրան» կինոյի զարգացման հասարակական կազմակերպությունը Հայոց ցեղասպանության 100-րդ տարելիցի առթիվ մի շարք երկրներում կազմակերպում է թեմատիկ ֆիլմերի ցուցադրություններ: Ինչպես հաղորդում են կազմակերպության մամուլի ծառայությունից, ծրագրի շրջանակներում մարտի 13-ից 19-ը ցուցադրություններ են կազմակերպվել Սոֆիայի 19-րդ միջազգային կինոփառատոնի շրջանակներում: Հայոց ցեղասպանության հարյուրամյակին նվիրված ծրագրում ընդգրկված  է եղել երեք ֆիլմ՝ Հարություն Խաչատրյանի «Անվերջ փախուստ, հավերժ վերադարձը», Տավիանի եղբայրների «Արտույտների ագարակը»  և Ֆաթիհ Աքինի «Սպի»-ն: Ցուցադրություններ կազմակերպվել նաև Բուլղարիայի Պլովդիվ և Վարնա քաղաքներում: Փառատոնին ներկա է գտնվել և  ծրագիրն ու ֆիլմերը ներկայացրել է ՀՀ Ժողովրդական  արտիստ, կինոռեժիսոր, «Ոսկե ծիրան» կինոփառատոնի հիմնադիր տնօրեն  Հարություն Խաչատրյանը: «Այլևս երբեք…»  կինոցուցադրությունների ծրագիրը հաջորդը կներկայացվի Ֆրանսիայի մայրաքաղաք Փարիզում: Ֆրանսիայում անցկացվող Եվրոպա ֆիլմ ակտը  Եվրոպայի կարևորագույն կինոփառատոներից մեկն է: Այդ փառատոնի շրջանակներում ևս հայկական ֆիլմերի ծրագիր է ներկայացվելու: Հայոց ցեղասպանությանն անդրադարձող ֆիլմերից զատ կներկայացվեն նաև հայկական կինեմատոգրաֆի այլ նմուշներ: