Դպրոցներում կխորացվի ՏՀՏ կրթությունը՝ ոլորտի ընկերությունների օգնությամբ
Civilnet
Կրթության և գիտության նախարարությունը ռազմավարական համագործակցություն է սկսում տեղեկատվական ու հեռահաղորդակցական տեխնոլոգիաների (ՏՀՏ) ոլորտի խոշոր ընկերությունների հետ՝ ՏՀՏ կրթությունը Հայաստանում որակապես նոր մակարդակի հասցնելու նպատակով: Մարտի 30-ին փոխըմբռնման քառակողմ հուշագիր է ստորագրվել կրթության և գիտության նախարարության, «ՎիվաՍել-ՄՏՍ», «Սինոփսիս Արմենիա» և «Յունիքոմփ» ընկերությունների միջև:
Ինչպես հաղորդում են «ՎիվաՍել-ՄՏՍ» ընկերության մամուլի ծառայությունից, փոխըմբռնման հուշագրում ներկայացված են ռազմավարական երկարաժամկետ ծրագրի ճանապարհային քարտեզի հիմնական կետերը, որոնք իրականացվելու են նախարարության և ՏՀՏ ոլորտի առաջատար ընկերությունների համատեղ և համակարգված ջանքերի շնորհիվ:
Հուշագրի համաձայն՝ կրթության և գիտության նախարարությունն ապահովելու է «Միկրոէլեկտրոնիկա», «Հեռահաղորդակցության հիմունքներ», «Տեղեկատվական տեխնոլոգիաներ» մասնագիտական առարկաների ներդրումը, ինչպես նաև մշակելու և հաստատելու է նշված մասնագիտական առարկաների առարկայական չափորոշիչները և ծրագրերը: Նոր ուսումնական պիլոտային ծրագիրը ՏՀՏ կրթության ոլորտում կներդրվի 2015-2016 ուսումնական տարվանից:
«ՎիվաՍել-ՄՏՍ-ը» մասնակցելու է «Հեռահաղորդակցության հիմունքներ» մասնագիտական առարկայի չափորոշիչների և ծրագրի մշակման գործընթացին և իրականացնելու է տվյալ առարկայի ուսուցիչների վերապատրաստումը: Բացի այդ՝ ընկերությունը պատրաստակամ է ֆինանսավորելու «Միկրոէլեկտրոնիկա», «Հեռահաղորդակցության հիմունքներ», «Տեղեկատվական տեխնոլոգիաներ» առարկաների լաբորատորիաների ստեղծումը: Ընդհանուր առմամբ, ծրագրի իրականացման նպատակով «ՎիվաՍել-ՄՏՍ»-ը հատկացնում է շուրջ 70 միլիոն դրամ:
Փոխըմբռնման հուշագրով այս տարի նախատեսված է կրթական ծրագրի իրականացում թվով հինգ ուսումնական հաստատություններում՝ Գյումրիի «Ֆոտոն» վարժարանում, «Քվանտ» վարժարանում, Վանաձորի մաթեմատիկայի և բնագիտական առարկաների խորացված ուսուցմամբ հատուկ դպրոցում, Հայաստանի պետական ճարտարագիտական համալսարանի Երևանի ավագ դպրոցում և Արտաշես Շահինյանի անվան ֆիզիկամաթեմատիկական հատուկ դպրոցում: Ծրագրով նախատեսված է «նշված առարկաների լաբորատորիաների ստեղծում»: Ուսումնական հաստատություններն ընտրվել են Կրթության և գիտության նախարարության հետ համատեղ:
Պատմություններ
