Սերժ Թանկյանը և Րաֆֆի Գրիգորյանը «Թումո»-ում կվարեն երաժշտական և տեխնոլոգիական քննարկումներ

Րաֆֆի Գրիգորյան և Սերժ Թանկյան Հայոց ցեղասպանության 100-րդ տարելիցի հաջորդ օրը հարյուրավոր մարդիկ «Թումո» ստեղծարար տեխնոլոգիաների կենտրոնում կմասնակցեն երկու միջոցառման՝ երաժշտական և տեխնոլոգիական գագաթաժողովների: Միջոցառումները, որոնք կընթանան զուգահեռ, կվարեն «Թումո»-ի խորհրդի անդամներ աշխարհահռչակ ռոք երաժիշտ Սերժ Թանկյանը և Twitter-ի նախկին փոխնախագահ Րաֆֆի Գրիգորյանը, հաղորդում է «Թումո»-ի կայքը: HIVE տեխնոլոգիական առաջնորդության գագաթաժողովը մեկ վայրում կհավաքի ծրագրավորողների, տեխնոլոգիական ոլորտի մենեջերների և ոլորտի առաջատար ընկերություններ Google-ի, Facebook-ի, Prezi-ի, Issuu-ի ներկայացուցիչների, ներկա կլինի նաև Reddit ընկերության հիմնադիր և գործադիր տնօրեն Ալեքսիս Օհանյանը: Գագաթաժողովի ընթացքում կանցկացվեն բանախոսություններ, փոխներգործուն սեմինարներ և հանդիպումներ բանախոսների հետ: Այս ամենին զուգահեռ երաժշտասերներն ու երաժիշտները կմասնակցեն երաժշտական գագաթաժողովին, որի շրջանակում հայտնի արտիստներն ու կոմպոզիտորները կքննարկեն Ցեղասպանության 100-րդ տարելիցից հետո հայկական երաժշտության նկատմամբ նոր մոտեցումները: Սերժ Թանկյանի գլխավորությամբ քննարկումներից առաջ կկատարվեն երաժշտական ստեղծագործություններ, և մասնակիցները հնարավորություն կունենան երաժշտական թեմաների` որպես հայկական ինքնության արտացոլման վերաբերյալ հարցեր ուղղել: Երկու միջոցառումների մասնակիցները հնարավորություն կունենան շփվել համատեղ ճաշի ընթացքում, ինչը կնպաստի արվեստի և տեխնոլոգիայի միջև երկխոսությանն ու փոխազդեցությանը: