Միջազգային մամուլի անդրադարձը Քանյե Ուեսթի երևանյան համերգին

Աշխարհահռչակ ռեփ երաժիշտ, պրոդյուսեր Քանյե Ուեսթը ապրիլի 12-ի կեսգիշերին անակնկալ անվճար համերգ տվեց Երևանում` Կարապի լճի մոտ: Համերգի ընթացքում նա կատարեց իր մի շարք հանրահայտ երգերից հատվածներ և կատարման ավարտին նետվեց Կարապի լիճը: Քանյեի օրինակին հետևեցին բազմաթիվ երկրպագուներ: Միջազգային մի շարք հեղինակավոր լրատվամիջոցներ անդրադարձել են Քանյեի համերգին: «Այն պահը, երբ Հիսուսը փորձել է քայլել ջրի վրայով: Քանյե Ուեսթը անակնկալ է մատուցել հայ երկրպագուներին՝ երևանյան լճի կենտրոնում հանպատրաստից համերգ տալով».- այսպիսի վերնագրով հոդված է հրապարակել բրիտանական Daily Mail-ը: «Քանյե Ուեսթը հնարավոր է՝ ձանձրացել էր իր կնոջ՝ Քիմ Քարդաշյանի և քենու՝ Քլոեի հետ հայաստանյան այցելության ընթացքում: Անցյալ կիրակի 37-ամյա ռեփերը Երևանի կենտրոնում՝ Կարապի լճի մոտ, անակնկալ է մատուցել երկրպագուներին՝ հանպատրաստից համերգ տալով,- գրել է պարբերականը: - Լճի մոտ համերգը տևել է ընդամենը մի քանի րոպե, սակայն նա վստահաբար Հայաստանի ժողովրդին հիշելու բան է թողել»: Քանյեի համերգին անդրադարձել է նաև աստղերի կյանքը լուսաբանող լոսանջելեսյան TMZ կայքը իր «Քանյե Ուեսթը կատաղել և թրջվել է հայստանյան անակնկալ անվճար համերգի ժամանակ» հոդվածում: MTV.com կայքն էլ գրել է, որ ոստիկանությունը դադարեցրել է շոուն այն բանից հետո, երբ Քանյեն ցատկել է ջուրը: «Դե ինչ, հնարավոր է՝ ջրի մեջ երգելը մի փոքր վտանգավոր է, սակայն պետք է ընդունել, որ դա հրաշալի էր»,- գրել է կայքը: Քանյե Ուեսթի երևանյան համերգին անդրադարձել են նաև BBC-ն և CNN-ը: Ամուսնու համերգի մասին Թվիթերում մի շարք զգացական գրառումներ է արել Քիմ Քարդաշյանը: «Խելահեղ գիշեր: Քանյեն ինձ արթնացրեց և ասաց, որ անվճար համերգ է տալու Երևանում՝ Հայաստանում: Ես արագ հագնվեցի և գնացինք»,- գրել է Քիմը:

Crazy night! Kanye wakes me up & says he's doing a free concert in Yerevan, Armenia! I throw on sweats & we go! pic.twitter.com/2cjbaJbz7q — Kim Kardashian West (@KimKardashian) April 12, 2015

Այն մասին, որ դա Քարդաշյանների վերջին երեկոն էր Հայաստանում, տեղեկանում ենք Քիմի մեկ այլ գրառումից:

Such an exciting crazy night! So happy I got to rock out with everyone in Armenia on our last night here!!!! #EpicNight #ArmenianPride — Kim Kardashian West (@KimKardashian) April 12, 2015

«Այնքան հուզիչ, խելահեղ գիշեր: Այնքան ուրախ եմ, որ մեր վերջին գիշերը բոլորի հետ զվարճացանք Հայաստանում»: