Հայոց ցեղասպանության 100-րդ տարելիցին նվիրված պատարագ Մոնրեալում

Հայոց ցեղասպանության 100-րդ տարելիցի միջոցառումների շրջանակներում ապրիլի 11-ին Կանադայի Մոնրեալ քաղաքում տեղի է ունեցել հոգեհանգստյան պատարագի կատարում։ Ինչպես հաղորդում են արտգործնախարարության մամուլի ծառայությունից, կոմպոզիտոր Պետրոս Շուժունյանի ստեղծած հոգեհանգստյան պատարագը կատարվել  է հանրահայտ «Սեն Լորան» երգչախմբի կողմից` Ֆիլիպ Բուրքի խմբավարությամբ, Սեն Ժան Բապտիստ եկեղեցում՝ շուրջ 2500 հանդիսատեսի ներկայությամբ։ Կանադական երգչախմբին, որպես մենակատարներ, միացել էին Սաշա Ջիհանյանը, Մարի-Անիք Բելիվոն, Էլի Բերբերյանը և Վարդան Գաբրիելյանը։ Իր ողջույնի խոսքում Կանադայում Հայաստանի դեսպան Արմեն Եգանյանը նշել է, որ Կանադայում շատ են մշակութային միջոցառումները Հայոց ցեղասպանության 100-րդ տարելիցի ոգեկոչման շրջանակներում, ինչն ընդգծում է, որ Օսմանյան կայսրությանը չհաջողվեց վերացնել հայ ազգին և նրա ստեղծագործ ոգին։