Civilnet
Շոկոլադի, դարչինի և ցիտրուսի երանգներ, մեղրի և վանիլի նրբերանգներ. բույրի և համի այսպիսի համադրությամբ Երևանի կոնյակի գործարանը վերաթողարկում է խորհրդային տարիներին մեծ ճանաչում ունեցած «Հայաստան» կոնյակը, որն ունի 45 տոկոս թնդություն, 10 տարվա հնեցում:
Ապրիլի 14-ին Երևանի կոնյակի գործարանում տեղի ունեցավ վերաթողարկված «Հայաստան» կոնյակի շնորհանդեսը: Այս կոնյակը ստեղծվել է 1940թ. հայկական կոնյակագործության մեծ վարպետ Մարգար Սեդրակյանի կողմից: 75 տարի անց «Հայաստան» կոնյակը վերաթողարկվում է՝ պահպանելով Սեդրակյանի հեղինակային կուպաժը:
«Վերածնված կոնյակը հավատարիմ է Մարգար Սեդրակյանի ստեղծած կոնյակին: Որոշակի փոփոխություններ և նոր շունչ է տրվել շշին»,- ասաց «Արարատ» ապրանքանիշի դեսպան Քրիստինա Իշխանյանը՝ հավելելով, որ «Հայաստան» կոնյակի շիշը տարբերվում է ԱՐԱՐԱՏ զանգվածային տեսականուն բնորոշ շշերից և արտաքին ձևավորումից, որը միտված է կրկնելու Հայաստանի պատմական տեսքը:
Կոնյակը ներկայացվում է Կոլեկցիոն տեսականու ներքո և առայժմ նախատեսված է հայաստանյան շուկայի համար: Իշխանյանը նշեց, որ «Հայաստան» կոնյակն ապագայում նաև կարտահանվի:
Պատմություններ
