Civilnet
ԱՄՆ-ի Եվրոպայում անվտանգության և համագործակցության հանձնաժողովում, որը հայտնի է նաև որպես ԱՄՆ-ի Հելսինկյան հանձնաժողով, ապրլի 23-ին Հայոց ցեղասպանության հարցով լսումներ կանցկացվեն՝ «Ժխտողականության մեկ դար. Հայոց ցեղասպանությունը և արդարության շարունակական որոնումը» խորագրով:
Հանձնաժողովի կայքում տեղադրված հաղորդագրության համաձայն՝ լսումներին կմասնակցեն ամերիկաբնակ թուրք պատմաբան, Հայոց ցեղասպանության վերաբերյալ մի շարք գրքերի հեղինակ Թաներ Աքչամը, Ամերիկայի հայ դատի հանձնախմբի նախագահ Քեն Խաչիկյանը, Ամերիկայի հայկական համագումարի հոգաբարձուների խորհրդի անդամ Վան Գրիգորյանը, Թաֆթսի համալսարանի Ֆլեթչերի դպրոցի հակամարտությունների կարգավորման հարցով հրավիրված պրոֆեսոր Էլիզաբեթ Փրոդրոմոուն և այլք:
«Արդի ժամանակաշրջանի առաջին ցեղասպանության 100-րդ տարելիցին հայերը շարունակում են պայքարել, որպեսզի 1915թ. ջարդերը, որոնց հետևանքով սպանվեց ավելի քան 1,5 մլն մարդ, ճանաչվեն որպես ցեղասպանություն: Թուրքիայի կառավարությունը շարունակում է ժխտել ցեղասպանությունը և ակտիվորեն պատժել այն ճանաչողներին:
Լսումներին կքննարկվեն Թուրքիայի կառավարության ժխտողականությունը և նրան պատասխանատվության ենթարկելու տասնամյակների ջանքերը:
Լսումները հնարավորություն կտան նաև գնահատել Թուրքիայի հանրության հակառակ հոսանքը, որը կարող է Թուրքիայի կառավարությանը տանել դեպի ճանաչում, ինչպես նաև ուսումնասիրել՝ ինչ կարող են անել ԱՄՆ-ը ու մյուս երկրները ճանաչման և ի վերջո նաև հաշտեցման հասնելու համար»,- ասված է հանձնաժողովի հաղորդագրության մեջ:
Պատմություններ
