Մահացել է լեգենդար ֆուտբոլիստ Հարություն Քեհեյանը

Ապրիլի 17-ին 85 տարեկանում վախճանվել է լեգենդար ֆուտբոլիստ, մարզիչ, ԽՍՀՄ սպորտի վաստակավոր վարպետ, Հայաստանի վաստակավոր մարզիչ Հարություն Քեհեյանը, հաղորդում է Հայաստանի ֆուտբոլի ֆեդերացիան:

Հարություն Քեհեյանը ծնվել է 1930թ. ապրիլի 9-ին Աթենքում: Նրա անունը հայկական ֆուտբոլի հետ կապված է 1948-ից: Որպես ֆուտբոլիստ, այնուհետև որպես մարզիչ Հարություն Քեհեյանը մեծ ներդրում է ունեցել հայկական ֆուտբոլի զարգացման գործում:

Քեհեյանը ԽՍՀՄ առաջնության բարձրագույն խմբում հանդես է եկել Երևանի «Դինամո» (1949-50)­, Մոսկվայի «Սպարտակ» (1955)­, Երևանի «Սպարտակ» (1960-61, հետագայում «Արարատ») թիմերում:

1973-ին նա «Արարատի» հետ մարզչական կազմում նվաճել է ԽՍՀՄ չեմպիոնի և գավաթակրի տիտղոսներ:

1975-ից Քեհեյանը «Հրազդան» մարզադաշտի տնօրենն էր: