Պուտինի երևանյան այցը Թուրքիայի հետ հարաբերություններին չի վնասի. Կրեմլ
Civilnet
Չենք սպասում, որ Թուրքիայից որևէ բացասական արձագանք կլինի ՌԴ նախագահ Վլադիմիր Պուտինի առաջիկա երևանյան այցին. այսպիսի մեկնաբանություն է արել Պուտինի խոսնակ Դմիտրի Պեսկովը՝ ի պատասխան Interfax գործակալության հարցին:
«Տվյալ դեպքում, մեր տեսանկյունից, այդ միջոցառումները [ապրիլի 24-ին Երևանում կայանալիք միջոցառումները՝ նվիրված Հայոց ցեղասպանության 100-րդ տարելիցին - ՍիվիլՆեթ] չեն կարող մեկնաբանվել որպես ինչ-որ բանի վնասող»,- ասել է Պեսկովը: Նա նշել է, որ Ռուսաստանին և Թուրքիային կապում են «զարգացած գործընկերության հարաբերություններ, որոնք ունեն տնտեսական փոխշահավետ համագործակցության ամուր հիմք»:
«Մեր դիրքորոշումները համաշխարհային բազմաթիվ խնդիրների շուրջ համընկնում են: Մեր հարաբերությունների հիմքը շատ ամուր է»,- հավելել է Պեսկովը՝ ընդգծելով, որ Հայաստանը «իրենց հարևանն է, որի հետ Ռուսաստանին կապում են տասնյակ հազարավոր տարբեր թելեր»:
Ավելի վաղ Կրեմլում հաստատել էին, որ ապրիլի 24-ին Վլադիմիր Պուտինը կժամանի Երևան՝ մասնակցելու Հայոց ցեղասպանության 100-րդ տարելիցին նվիրված միջոցառումներին:
Իրադարձություն
Պատմություններ
