Հայոց ցեղասպանության 100-րդ տարելիցին նվիրված քայլարշավ Լոնդոնում
Civilnet
Հայոց ցեղասպանության 100-րդ տարելիցի միջոցառումները համակարգող բրիտանական հանձնախմբի կողմից ապրիլի 18-ին կազմակերպվել էր բազմահազարանոց քայլարշավ Լոնդոնի կենտրոնական փողոցներով:
Ինչպես հաղորդում են արտգործնախարարության մամուլի ծառայությունից, երթը կանգ էր առել «Ուայթհոլ» կառավարական շրջանում տեղակայված «Փառապանծ զոհերի» հուշարձանի մոտ, որտեղ Հայ Առաքելական եկեղեցու Մեծ Բրիտանիայի թեմի և համայնքային կառույցների ղեկավարները, ինչպես նաև՝ արարողությանը միացած ՀՀ դեսպանության ներկայացուցիչները ծաղկեպսակներ են զետեղել` ի հիշատակ Հայոց ցեղասպանության զոհերի: Կատարվել է նաև հոգեհանգստի արարողություն: Երթն ավարտվել է Սուրբ Պողոսի տաճարի դիմաց տեղի ունեցած հիշատակի միջոցառմամբ:
Նույն օրը Լոնդոնի ամենահայտնի և մեծ եկեղեցիներից մեկում՝ Սաուդարկի Մայր տաճարում, տեղի է ունեցել հիշատակի բազմամարդ միջոցառում: Միջոցառմանը ներկա են եղել Լոնդոնում հավատարմագրված դեսպաններ, դիվանագետներ, Անգլիկան և քույր եկեղեցիների բարձրաստիճան հոգևորականներ, բրիտանահայ համայնքի ներկայացուցիչներ, լրագրողներ, բազմաթիվ հյուրեր:
Ներկաներին ողջունել է Սադակի Մայր տաճարի դեկան, գերաշնորհ Էնդրյու Նանը: Այնուհետև ելույթ են ունեցել Եվրոպական խորհրդարանի բրիտանացի պատգամավոր Չարլզ Թանոքը, Ցեղասպանագետների միջազգային միության նախկին նախագահ, պրոֆեսոր Ուիլյամ Շաբասը, Լորդերի պալատի անդամ, Հայաստանի և Արցախի բարեկամ, Բարոնուհի Քոքսը և Ռուսական ուղղափառ եկեղեցու Սուրոժի արքեպիսկոպոս Ելիսեյը:
Ամփոփիչ ելույթով ներկաներին դիմել է Միացյալ Թագավորությունում ՀՀ դեսպան Արմեն Սարգսյանը, ով իր ընտանիքի պատմության օրինակով ներկայացրել է Ցեղասպանության հետևանքով հայերի հայրենազրկումը, կրած ցավն ու տառապանքները և հայի` վերապրելու ուժն ու աննկուն ոգին, ճշմարտության և արդարության գերակայության անխուսափելի լինելը:
Իրադարձություն
Պատմություններ
