Ցեղասպանության զոհերի հիշատակին նվիրված խաչքար՝ բելգիական Մեխելենում
Civilnet
Ապրիլի 19-ին Բելգիայի Մեխելեն քաղաքում Հայոց ցեղասպանության 100-րդ տարելիցի միջոցառումների շրջանակում տեղի է ունեցել Ցեղասպանության անմեղ զոհերի հիշատակին նվիրված խաչքար-հուշարձանի բացման հանդիսավոր արարողություն, որին ներկա էին և ելույթով հանդես են եկել Բելգիայում ՀՀ դեսպան Թաթուլ Մարգարյանը, Մեխելենի քաղաքապետ Բարտ Սոմերսը, Եվրոպայի Հայ դատի գրասենյակի ներկայացուցիչ Պետո Դեմիրճանը և Մեխելենի «Ցեղասպանության թանգարանի» տնօրեն Հերման Վան Գութեմը:
Ինչպես հաղորդում են ԱԳՆ մամուլի ծառայությունից, խաչքարն օծվել է Արևմտյան Եվրոպայի Հայրապետական պատվիրակի Բենելյուքսի փոխանորդ, հոգեշնորհ Տեր Զատիկ Վարդապետ Ավետիքյանի կողմից: Օծման արարողությունից հետո հնչել են ազգային երգերի կատարումներ, ասմունքով հանդես են եկել հայ երիտասարդական կազմակերպությունների ներկայացուցիչները:
Իր ողջույնի խոսքում դեսպան Մարգարյանը շնորհակալություն է հայտնել Մեխելենի «Անի» հայերի միությանը, բոլոր նրանց, ովքեր ներդում են ունեցել հուշարձանի կերտման ու տեղադրման գործում, և գոհունակություն արտահայտել այն առթիվ, որ Մեխելիենի հայ համայնքը վայելում է տեղի իշխանությունների հարգանքն ու ուշադությունը: Դեսպանը նշել է նաև, որ նման միջոցառումները վկայությունն են այն բանի, որ Հայոց ցեղասպանության ճանաչման և դատապարտման ջանքերը հետևողականորեն շարունակվելու են:
Իրադարձություն
Պատմություններ
