Թուրքիան սպառնում է Ավստրիային

Թուրքիայի արտգործնախարար Մևլութ Չավուշօղլուն նախազգուշացրել է, որ ավստրիացի օրենսդիրների կողմից Հայոց ցեղասպանության դատապարտումը անխուսափելիորեն բացասական հետևանքներ կունենա Թուրքիայի և Ավստրիայի միջև հարաբերությունների համար, հաղորդում է Hurriyet Daily News-ը՝ վկայակոչելով դիվանագիտական աղբյուրները: Չավուշօղլուի արձագանքը հետևել է ապրիլի 23-ին ավստրիացի իր պաշտոնակից Սեբաստիան Կուրցի հետ հեռախոսազրույցին՝ Ավստրիայի խորհրդարանի ընդունած հայտարարության մասին: *** Ավստրիայի խորհրդարանի բոլոր վեց խմբակցություններն ընդունել են համատեղ հայտարարություն Հայոց ցեղասպանության ճանաչման ու դատապարտման վերաբերյալ: Հայտարարությունը պաշտոնապես հրապարակվել է ապրիլի 22-ին Ավստրիայի խորհրդարանի նիստում, որի մեկնարկին բոլոր ուժերը լռության րոպեով հարգել են Հայոց ցեղասպանության զոհերի հիշատակը: ՀՀ ԱԳՆ-ն ողջունել է հայտարարությունը՝ նշելով, որ «այս քայլով Ավստրիան կարևոր ներդրում կատարեց ցեղասպանությունների և մարդկության դեմ հանցագործությունների կանխարգելման վեհ գործում»։ Ավստրիայի խորհրդարանի ընդունած հայտարարությունից հետո՝ ապրիլի 22-ին, Թուրքիան խորհրդակցությունների համար հետ է կանչել Վիեննայում իր դեսպանին: