Civilnet
Երևանում ապրիլի 24-ին տեղի է ունեցել Ֆրանսիայի և Ռուսաստանի նախագահներ Ֆրանսուա Օլանդի և Վլադիմիր Պուտինի հանդիպումը: Նրանք երկուսն էլ Հայաստանում էին՝ մասնակցելու Հայոց ցեղասպանության 100-րդ տարելիցի արարողություններին:
Պաշտոնական Կրեմլի հաղորդմամբ՝ Պուտին-Օլանդ հանդիպմանը քննարկվել են երկկողմ օրակարգի ակտուալ հարցեր, Ռուսաստան-Եվրամիություն փոխգործակցության, Ուկրաինայի վերաբերյալ Մինսկի համաձայնությունների կատարման հարցեր:
Պուտինը իր խոսքում ափսոսանք է հայտնել, որ ՌԴ-ԵՄ հարաբերությունները այդքան էլ լավ վիճակում չեն, կրճատվում է առևտրաշրջանառությունը, այդ թվում՝ Ֆրանսիայի հետ: «Կարծում եմ, որ պետք է մեր հարաբերությունների վերականգնման ուղիներ գտնենք, և կարծում եմ՝ դրանում շահագրգռված են բոլորը»,- ասել է Պուտինը:
Նրա խոսքով՝ Օլանդը շատ բան է արել Ուկրաինայի՝ մինսկյան համաձայնություններին հասնելու համար:
Օլանդը համակարծիք է եղել Պուտինի հետ հարցում, որ ՌԴ-ԵՄ հարաբերությունները վատաթարացել են՝ կապված ուկրաինական ճգնժամի հետ:
«Այս իրավիճակից լավագույնս դուրս գալու համար պետք է շարժվել մինսկյան համաձայնությունների կատարման ուղիով: Մենք երկուսս էլ ձգտում ենք դրան, աշխատում դրա վրա, ջանքեր գործադրում, որպեսզի դրանք կյանքի կոչվեն: Կան մի շարք հարցեր, որ կարող են քննարկել, քանի որ դրանում անհրաժեշտ է ինչպես Ռուսաստանի, այնպես էլ Ֆրանսիայի դերը, ինչպես օրինակ Սիրիայի, Իրանի, Իրաքի, Լիբիայի հարցը: Բոլորս աշխատում ենք այդ ուղղությամբ, հենց դրա համար էլ մեզ անհրաժեշտ էր հանդիպել այստեղ՝ Երևանում»,- ասել է Օլանդը:
Պատմություններ
