Լյուքսեմբուրգը ճանաչեց Հայոց ցեղասպանությունը
Civilnet
Լյուքսեմբուրգը ճանաչել է Հայոց Ցեղասպանությունը: Լյուքսեմբուրգի Մեծ Դքսության խորհրդարանը Ցեղասպանությունը ճանաչող բանաձևը միաձայն ընդունել է մայիսի 6-ին, հաղորդում է Հայաստանի արտգործնախարարության մամուլի ծառայությունը:
Արտգործնախարար Էդվարդ Նալբանդյանը հանդես է եկել հայտարարությամբ՝ նշելով, որ «Հայաստանը ողջունում է Լյուքսեմբուրգի պատգամավորների պալատի կողմից Հայոց ցեղասպանության ճանաչման վերաբերյալ բանաձևի միաձայն ընդունումը»:
«Շարունակվում է միջազգային հանրության կողմից Հայոց ցեղասպանության փաստի ճանաչման անշրջելի գործընթացը։ Լյուքսեմբուրգի խորհրդարանը, հարգանքի տուրք մատուցելով Մեծ Եղեռնի զոհերի հիշատակին, ընդգծում է, որ մեկ դար առաջ Օսմանյան կայսրությունում հայերի դեմ իրականացվածը հենց ցեղասպանություն է, և կոչ անում Թուրքիայի իշխանություններին առերեսվել սեփական պատմությանը։ Այս բանաձևի ընդունմամբ Լյուքսեմբուրգը համալրեց Ցեղասպանությունը ճանաչած երկրների շարքը և իր կարևոր ներդրումը բերեց մարդկության դեմ նոր հանցագործությունների կանխարգելման վեհ գործին»,- ասել է Էդվարդ Նալբանդյանը։
Իրադարձություն
Պատմություններ
