Թուրքիան հետ է կանչել Լյուքսեմբուրգում իր դեսպանին
Civilnet
Թուրքիան մայիսի 7-ին խորհրդակցությունների համար հետ է կանչել Լյուքսեմբուրգում իր դեսպան Լևենտ Շահինքայային դքսության խորհրդարանի կողմից Հայոց ցեղասպանությունը ճանաչելուց հետո: Բացի այդ` Անկարայում Լյուքսեմբուրգի դեսպանը կանչվել է Թուրքիայի արտգործնախարարություն: Այս մասին ասված է Թուրքիայի արտգործնախարարության` Լյուքսեմբուրգի խորհրդարանի կողմից բանաձևի ընդունման առնչությամբ արված հայտարարությունում:
«Մենք դատապարտում և վճռականորեն մերժում ենք անարդար բանաձևը, որն ընդունել է Լյուքսեմբուրգի խորհրդարանը` խեղաթյուրելով պատմական փաստերն ու իրավունքը:
Եթե խորհրդարաններն իրենց դնում են միջազգային դատարանների տեղում և փորձում են դատողություններ անել այնպիսի հանցագործությունների վերաբերյալ, ինչպիսին ցեղասպանությունն է, նրանք չարաշահում են պատմությունն ու իրավունքը»,- ասված է հայտարարությունում:
***
Լյուքսեմբուրգի Մեծ Դքսության խորհրդարանը Հայոց ցեղասպանությունը ճանաչող բանաձևը միաձայն ընդունել էր մայիսի 6-ին:
Ավելի վաղ` ապրիլին, Թուրքիան հետ էր կանչել նաև Վատիկանում և Ավստրիայում իր դեսպաններին:
Պատմություններ
