Ոստիկանական «որս» լրագրողների նկատմամբ

Հունիսի 23-ի վաղ առավոտյան` 5.30-ի սահմաններում, ոստիկանությունը ուժի ու բռնության գործադրմամբ ցրեց Բաղրամյան պողոտայի սկզբնամասում հավաքված ցուցարարներին, որոնք պահանջում էին չեղյալ հայտարարել Հանրային ծառայությունները կարգավորող հանձնաժողովի՝ էլեկտրաէներգիայի թանկացման մասին որոշումը: Ոստիկանության հայտարարության համաձայն` բերման է ենթարկվել 237 քաղաքացի:

Ջրցան մեքենայի, քաղաքացիական հագուստով ոստիկանների մասնակցությամբ իրականացված ոստիկանական գործողությունից իրենց մասնագիտական պարտականությունները կատարելիս տուժել ու բերման են ենթարկվել նաև մի շարք լրագրողներ: Ոստիկանները կոտրել են նրանց աշխատանքային տեխնիկան, առգրավել տեխնիկայի և հեռախոսների հիշողության քարտերը:

Ոստիկանության բռնության հետևանքով կոտրվել է «Ազատություն ռադիոկայանի» տեսախցիկը և ուղիղ հեռարձակման սարքը, մարմնական վնասվածքներ է ստացել ռադիոկայանի օպերատորը:

«Հայկական ժամանակ» օրաթերթի լրագրող Մկրտիչ Կարապետյանին բերման են ենթարկել ոստիկանության Մալաթիայի բաժին. նա հայտնել է, որ վնասվել է իր տեսախցիկը:

Նույն բաժին է բերման ենթարկվել նաև «Գալա» հեռուստաընկերության լրագրող Փայլակ Ֆահրադյանը: Նա տեղեկացրել է, որ վնասվածքներ է ստացել ձեռքերի ու պարանոցի շրջանում:

Դաժան բռնության և ծեծի են ենթարկվել www.1in.am-ի օպերատորներ Կարեն Չիլինգարյանը, Հովսեփ Հովսեփյանը և Գոռ Հովհաննիսյանը: Նրանք պնդում են, որ իրենց ծեծելու հրամանը տվել է ոստիկանության զորքերի հրամանատար, փոխոստիկանապետ Լևոն Երանոսյանը:

Տեսանյությում երևում է նաև, թե ինչպես է բռնության ենթարկվում panarmenian.net-ի ֆոտոլրագրող Կարո Սահակյանը. նա ևս բերման է ենթարկվել ոստիկանության բաժին:

Կոտրել են նաև ACTV-ի օպերատոր Աշոտ Բոյաջյանի լուսանկարահանող սարքը:

Բերման են ենթարկվել նաև «Hetq.am»-ի լրագրողներ Անի Հովհաննիսյանն ու Հրանտ Գալստյանը:

Lragir.am-ի լրագրող Թեհմինե Ենոքյանը տարածել է տեսանյութ, որում երևում է, թե ինչպես է քաղաքացիական հագուստով ոստիկանը սեռական բնույթի վիրավորանք հասցնում իրեն:

media.am-ը սոցիալական ցանցերից հավաքել է փաստեր լրագրողների դեմ իրականացված այլ բռնությունների վերաբերյալ:

Ilur.am-ի լրագրող Հակոբ Կարապետյանն իր ֆեյսբուքյան էջում պատմել է, որ ականատես է եղել, թե ինչպես է ՀՀ փոխոստիկանապետ Լևոն Երանոսյանը հրահանգում «որսալ» լրագրողներին: