Civilnet
ՍիվիլՆեթը հունիսի 27-ին էլեկտրաէներգիայի թանկացման դեմ բողոքի շարունակվող ցույցը ներկայացնում է հակադարձ ժամանակագրությամբ: Ցույցերը կարող եք դիտել նաև ՈՒՂԻՂ հեռարձակմամբ:
23:55
Հետևելով վերջին օրերի ավանդույթին` հնչում է «Գետաշեն» երգը:
23:35
Էլեկտրաէներգիայի թանկացման դեմ բողոքի ակցիա է անցկացվում նաև ԱՄՆ Կալիֆոռնիա նահանգի Գլենդել քաղաքում: Արդեն 5 օր է, ինչ ժամը 19-ին մարդիկ հավաքվում են Գլենդելի ՀՀ հյուպատոսության առջև: Բոլոր ցանկացողները ելույթներ են ունենում, իսկ վերջում դրամահավաք է անցկացվում: Ակցիայի մասնակիցներից Լևոն Առաքելյանը ՍիվիլՆեթին հայտնեց, որ իրենց նպատակը որևէ կերպ օգնելն է Բաղրամյանում նստացույց անողներին: Հավաքված գումարով բարձրախոսներ, վրաններ են պատվիրել և ուղարկել Հայաստան:
23:25
Ըստ իս` ՀԷՑ-ի ազգայնացումը սխալ է: Եթե ազգայնացվի ու լավ կառավարիչ լինի, լավ լուծում է, սակայն պետությունը շատ վատ կառավարիչ է: Խնդիրը կառավարչի մեջ է, դա պետք է լինի շահույթ հետապնդող, լավ համբավ ունեցող ընկերություն. Հայկ Գևորգյան, տնտեսական մեկնաբան
23:23
Հանգամանքը, որ բեռը դրվում է ամենազգայուն` անվտանգության համակարգի վրա, արդեն գեղեցիկ չէ: Որքան էլ ուզում ենք խոսել սակագնի մասին, սակայն այն ավելի երկրորդային է: Անվտանգությունը պետք է լինի անձեռնմխելի ոլորտ. Հայկ Գևորգյան, տնտեսական մեկնաբան
23:22
Եթե խոսքը գնում է զուտ ֆինանսական աուդիտի մասին, ապա այստեղ թակարդ կա, քանի որ կառավարման մեխանիզմը չի շոշափում. Հայկ Գևորգյան, տնտեսական մեկնաբան
23:00
Բաղրամյան պողոտայում տրամադրությունն օրըստօրե ավելի բարձր է. հնչում են հայրենասիրական, ազգագրական երգեր: Հետևեք մեր ուղիղ միացմանը ցույցից: #ElectricYerevan
22:55
Սա, ըստ էության, քաղաքական պայքար է քաղաքական իմաստով. Գյումրիի «Ասպարեզ» ակումբի նախագահ Լևոն Բարսեղյան
22:55
Անհաջող բլեֆ է անում Սերժ Սարգսյանը` կպչելով անվտանգության գումարներին: Մինչև թանկացումը պետք էր իսկական աուդիտ ունենալ: Այս զավթած իշխանությունը չի կարող որակյալ աուդիտ անել: Մարդկանց, իմ պահանջը հստակ է` չեղարկել խայտառակ որոշումը: Երևի իսկապես չի պատկերացնում մարդկանց տրամադրությունը. Գյումրիի «Ասպարեզ» ակումբի նախագահ Լևոն Բարսեղյան
22:30
Նախագահը ունի վետոյի հնարավորություն: Չկա չլինող բան: Ուղղակի սա փափուկ բարձ էր նրանց կողմից. Սերժ Սարգսյանի հայտարարության մասին` Վաղինակ Շուշանյանը «Ոչ թալանին» նախաձեռնությունից:
22:23
Այո, խաղաղ բնույթ է կրում ցույցը, սակայն անօրինական է: Տեղափոխվեք օրինական դաշտ: Հակառակ դեպքում ոստիկանությունը կվերականգնի հասարակական կարգը: Դադարեցնելու բոլոր հիմքերն ունենք, սակայն լարվածություն չենք ուզում. Երևանի փոխոստիկանապետ Վալերի Օսիպյան
22:15
Ցույցի կազմակերպիչները դիմում են ժողովրդին` վաղը ժամը վեցին կրկին Բաղրամյանում մոբիլիզացվելու կոչով: Խնդրում և հորդորում են գիշերվա ընթացքում բաժանվել խմբերի, քննարկել և գալ ընդհանուր հայտարարի: Նրանք կոչ են անում ոստիկանությանը գիշերվա ընթացքում խոչընդոտներ չստեղծել:
22:12
Մեր լրագրող Սարգիս Խանդանյանը փոխանցում է, որ ՀՀ փոխոստիկանապետ Հունան Պողոսյանը Բաղրամյանում կատարվողը արկածախնդրություն է որակել և ասել, որ ոստիկանությունը հնարավոր է` հայտարարությամբ հանդես գա: Միացեք մեր ուղիղ հեռարձակմանը:
22:05
Չնայած սկսված անձրևին` ցուցարարները շարունակում են մնալ Բաղրամյան պողոտայում, նրանք երգում են ու պարում:
21:35
Սերժ Սարգսյանի հայտարարությունները մեկը մյուսից աբսուրդ են. Արայիկ Հարությունյան, «Քաղաքացիական պայմանագիր»
21:25
Չնայած Սերժ Սարգսյանի այսօրվա` ցույցը դադարեցնելու հորդորներին` այս պահին Բաղրամյանում հավաքված են հազարավոր մարդիկ, հնչում է երաժշտություն, իրավիճակը հանգիստ է:
21:10
Ցուցարարներից մեկն իրեն վատ է զգացել. շտապօգնություն են կանչել:
21:05
Ցույցի կազմակերպիչները մեր լրագրողին տեղեկացրել են, որ հայտարարություն են պատրաստում:
21:00
Ցուցարարները երգում են «Երազ իմ երկիր հայրենի» երգը:
20:50
Ես հպարտ եմ այստեղի լրագրողներով, նրանց միջև համերաշխությամբ. լրագրող Գեղամ Վարդանյան
20:30
Բաղրամյան պողոտայում հնչում է ՀՀ պետական հիմնը:
20:07
Ցուցարարները հայտարարեցին, որ իրենց խաղաղ նստացույցը շարունակվում: «Պայքարելու ենք մինչև վերջ»,- ասում են նրանք:
19:57
Ցուցարարները վանկարկում են` «Չեղարկել, չեղարկել»:
19:50
Վերլուծաբան Արգիշտի Կիվիրյանը ՍիվիլՆեթի հետ զրույցում ասաց, որ սա ժողովրդին մոլորեցնելու փորձ է, սա որևէ առումով առաջ քայլ չէ: Իշխանությունները փորձում են ժամանակ շահել: Ժողովուրդը պետք է կրկնապատկի, եռապատկի իր պայքարը:
19:48
ՍիվիլՆեթի լրագրող Արփի Մախսուդյանը ցուցարարների շրջանում փոքրիկ հարցում անցկացրեց Սերժ Սարգսյանի առաջարկի վերաբերյալ: Ոմանք սա համարում էին առաջ քայլ: Ցուցարարներից մեկն ասաց, որ թյուրընմբռնումներից խուսափելու համար լավ կլինի, որ Սերժ Սարգսյանի և ցուցարարների մի խմբի միջև ուղիղ բանակցություններ անցկացվեն հարցի շուրջ:
19:25
Ցուցարարները փոխեցին իրենց որոշումը, և հրաժարվում են ընդունել Սերժ Սարգսյանի առաջարկը, քանի որ իրենց պահանջը չի կատարվել` էլեկտրաէներգիայի թանկացման որոշումը չեղյալ չի հայտարարվել: Նրանք որոշեցին շարունակել իրենց նստացույցը Բաղրամյան պողոտայում:
19:22
ՀՀ ոստիկանապետ Վլադիմիր Գասպարյանը Բաղրամյան պողոտայում է: Նա ասում է, որ «իրար կհասկանանք և մարդիկ կցրվեն»:
19:20
Քաղաքագետ Անդրիաս Ղուկասյանը սա համարում է միջանկյալ հաղթանակ: Նրա խոսքով` սա ուղղակի հնարք է` ինչպես չկատարել իրենց առջև դրված պահանջը` չեղարկել սակագնի բարձրացման որոշումը:
19:15
Ցուցարարներն ընդունեցին Սերժ Սարգսյանի առաջարկը:
18:54
Սերժ Սարգսյանը խորհրդակցություն է հրավիրել տնտեսական քաղաքականության պատասխանատուների հետ: «Ինչպես նշեցի, համոզված եմ՝ սակագնի բարձրացումը չեղյալ հայտարարելը ծայրահեղ վտանգավոր է: Ուստի, մինչև եզրակացության կազմումը այդ ընկերության կողմից կառավարությունը իր վրա կվերցնի սակագնի բարձրացման ամբողջ բեռը: Անշու՛շտ, մենք ընթացող ծրագրերին կամ սոցիալական ծախսերին չենք դիպչի, այլ գումարներ կգտնենք անվտանգության հետագա ամրապնդման համար նախատեսվող միջոցներից»,- ասել է Սերժ Սարգսյանը: Արդյոք Սերժ Սարգսյանը «անվտանգության հետագա միջոցներ» ասելով նկատի ունի Ռուսաստանից ներգրավվելիք 200 մլն դոլար վարկը, չի մանրամասնվում:
ՀՀ նախագահի մամուլի գրասենյակի տարածած հաղորդագրությունն ամբողջությամբ՝ ստորև.
Նախագահ Սերժ Սարգսյանն այսօր խորհրդակցություն է անցկացրել Հանրապետության տնտեսական քաղաքականության պատասխանատուների հետ, որի ընթացքում շարունակվել են Հայաստանի էներգետիկ անվտանգությանը, այդ համակարգի հետագա առողջացմանը և առկա խնդիրներին լուծումներ գտնելուն ուղղված քննարկումները: Խորհրդակցության սկզբում Հանրապետության Նախագահը հանգամանորեն անդրադարձել է վերոնշյալ խնդիրներին, էլեկտրաէներգիայի սակագնի բարձրացման հիմնավորումներին, միաժամանակ իր դիրքորոշումն ու մոտեցումները ներկայացրել վերջին օրերին հասարակական ակտիվիստների բողոքի ակցիայի ժամանակ բարձրացվող խնդիրների և դրանց լուծման հնարավոր տարբերակների վերաբերյալ.
«Վարչապետի հետ մենք երեկ կրկին շատ երկար ենք խոսել և որոշել ենք այսօրվա մեր այս հերթական քննարկումը ավելի տեսանելի դարձնել մարդկանց համար, լուսաբանել այն, թեպետ աշխատանքային քննարկումները սովորաբար չեն լուսաբանվում, քանի որ հասարակության համար առաջնային են արդյունքները և ոչ թե այն աշխատանքը, որ կատարվում է դրանց հասնելու համար: Այնուամենայնիվ, սա կարևոր է այսօր, որպեսզի մարդիկ տեսնեն, թե վերջին ամիսների ընթացքում այսպես ինտենսիվորեն ընթացող մեր քննարկումներն ինչ ուղղությամբ են գնում, որտեղից ենք սկսել, որտեղ ենք հիմա և ուր ենք ուզում հասնել:
Անկեղծ ասած՝ այս գործընթացի մասին ես ուզում էի խոսել նաև մեր հասարակական ակտիվիստների հետ, երբ նրանք հանդիպում էին ցանկացել, և ես նրանց հրավիրել էի զրուցելու: Ինչևէ, բողոքի ակցիայի վերաբերյալ մեր մոտեցումները չեն փոխվել, թեկուզև հանդիպելու համար կարծես հնարավոր չեղավ խումբ ընտրել, ևչեն փոխվել նաև մեր հորդորները՝ խոսելու, բողոքելու, բարձրաձայնելու իրավունքի իրականացման ընթացքում զերծ մնալ անօրինա-կանություններից, և, ի վերջո, հրաժարվել մայրաքաղաքի կենտրոնը առավել ծանրաբեռնելու քայլերից:
Այո՛, ժողովրդավարության ուղին, քաղաքացիական հասարակության կայացման ուղին բարդ և խորդուբորդ է, սակայն դեպի ժողովրդավարություն տանող ուղուն մեր երկիրն այլընտրանք չունի: Այս մասին վերջին տարիների ընթացքում մենք մեկ անգամ չենք խոսել: Այս խորդուբորդ ու ոլոր ճանապարհով պիտի ընթանանք բոլորս: Այդ ճանապարհին սայթաքելով ու գլորվելով, աշխատելով ու անքուն գիշերներ անցկացնելով, իրար ցավեցնելով ու իրար սատարելով, իրար սովորեցնելով ու իրարից սովորելով, իրար չհասկանալով ու իրար լսելով, իրար չվստահելով և իրար հավատալով, երբեմն գոռալով ու վրդովվելով... իրարից նեղանալով ու իրար հարգելով... որովհետև այդ ճանապարհը պիտի անցնենք բոլորով, յուրաքանչյուրս առանձին վերցրած... որովհետև ճանապարհի հանգրվանին պիտի հասնենք բոլորով, առանց կորցնելու իրար, հեռանալով իրարից ու իրար մոտենալով, բայց միշտ իրար հետ... սակայն Աստված չանի, որ շեղվենք այդ ճանապարհից ու իրար կորցնենք այս բարդ աշխարհում... Այդ դեպքում կկորցնենք մեր ապագան, հերթական անգամ կկորցնենք «մենք»-ը ու էլի երկար հարյուրամյակներ չենք գտնի, կդառնանք ուրիշ «մենք»-ի մի «դրանք» մասնիկը, մինչև օրերից մի օր նորից բոլորով կանգնենք մեկ ուղու վրա՝ ինչպես 1988-ին:
Երբ ես ասում եմ, որ մենք պիտի սովորենք իրարից, մենք պիտի միշտ դեմքով լինենք մեկս մյուսին. ես նկատի ունեմ բոլորին, յուրաքանչյուրիս:
Ե՛վ իշխանությունը, և՛ իրավապահները, և՛ ցուցարարներն այս ուղղությամբ արել են առաջին քայլերը, և դա բնական է:
Նաև ուզում եմ հստակ հայտնել իմ դիրքորոշումը այն մարդկանց, այն ուժերի հանդեպ, որոնք իրենց պատեհական շահերի համար պատրաստ են սադրել, սրել իրավիճակը, անդնդել մեր վստահության դարուփոսերը, ովքեր խաղաղ հավաքները պատրաստ են մարտադաշտ դարձնել՝ մեկ ժամով այդ մարտադաշտում զորավար լինելու մարմաջով... նմանների հանդեպ իրավապահները եղել և լինելու են խիստ ու անողոք...
Ցավոք, շատ հարցերի պատասխանները հնարավոր չէ տալ այնքան արագ և այնպես, ինչպես կցանկանայինք բոլորս։ Եվ հաճախ, խնդիրների լուծման արագության և մեր ակնկալիքների դիմաց վճարում են իրավապահները, մինչդեռ այդ խնդիրների լուծման բեռը նրանցը չէ: Հաճախ հենց նրանք են հարկադրված կատարել ամենածանր աշխատանքը, և, ցավոք, հաճախ, հասարակության անվտանգությունն ապահովող, իր պարտականությունը կատարող ոստիկանը նույնպես դառնում է ամենաթողության զոհ:
Այս առումով պետք է շեշտեմ նաև լրագրողների ու լրատվամիջոցների դերը. շատ կարևոր է առավելապես բռնության և քաոսի դրամատիկ պատկերներ լսարանին արհեստականորեն հրամցնելու փոխարեն, անկառավարելի մի քանի արկածախնդրի վրա կենտրոնանալու փոխարեն, արժանին մատուցել այն բազմաթիվ խաղաղ ցուցարարներին, որոնք էլ հենց խաղաղ հավաքների ոգին են, կամքն են ու միտքը: Բռնության կոչով մեկ պատկերը կարող է կրկին ու կրկին հայտնվել էկրաններին և սոցիալական ցանցերում, իսկ հազարավոր խաղաղ ցուցարարները մնան ստվերում: Բարեբախտաբար պիտի նշեմ, որ այս օրերին մեր լրատվամիջոցների հերոսներն ավելի ու ավելի հաճախակի եղել են հենց խաղաղ ցուցարարները և հենց հայկական լրատվամիջոցների ջանքերով աշխարհը ստանում է հավասարակշռված տեղեկատվություն իրադարձությունների վերաբերյալ, իսկ մեր պետությունը կարողանում է հակազդել հակահայկական ապատեղեկատվությանը:
Ուզում եմ արձանագրել մի փաստ ևս. ցուցարարները և իրավապահներն այս մի քանի օրերի ընթացքում կարողացան ավելի մեծ փոխադարձ վստահություն ձևավորել, քան հնարավոր էր մի քանի տասնամյակի ընթացքում: Ես, անշուշտ, հետևել եմ վերջին զարգացումներին և ուզում եմ արձանագրել, որ հունիսի վերջին շաբաթվա ընթացքում Հայաստանը դարձավ մի մեծ ու արդյունավետ ուսումնական կենտրոն՝ համալսարան, որտեղ մեր քաղաքացիներն ու իրավապահները, լրագրողներն ու պատգամավորները, մտավորականներն ու օտարերկրացիները սովորեցնում էին իրար ու սովորում էին իրարից, լսում էին իրար, անգամ խնդրի հանդեպ անհանդուրժողականությամբ ափեափ լցված հանդուրժում էին միմյանց, լսում էին այնպես, ինչպես աշխարհի քիչ անկյուններում իրար լսել գիտեն:
Այս օրերին մենք հիացնում ենք բոլորին մեր պատասխանատվությամբ և ակտիվությամբ: Ակնկալում եմ, որ երիտասարդները նույնպիսի խոհեմություն և իմաստություն կցուցաբերեն նաև մեր վաղվա օրվա հանդեպ, իսկ մեր վաղվա օրվա ապահովությունը պահանջում է պահպանել այն կենսական համակարգերը, որոնք սնում են մեր երկրի տնտեսությունն ու յուրաքանչյուրիս ընտանիքը: Մենք չենք կարող կտրել մեր երկրի կենսական օրգանները սնող զարկերակներն ու երակները միայն այն բանի համար, որ դրանք ախտահարված են հիվանդությամբ: Մենք չենք կարող մեր երկիրը զրկել արյունից ու թթվածնից՝ կենտրոնանալով միայն նրա էներգետիկ զարկերակներն ախտահարած խնդիրների պատճառների վրա: Առաջնահերթ կերպով մենք պիտի լուծումներ փնտրենք այդ կենսական համակարգը փրկելու համար՝ զուգահեռաբար բուժելով այն, վերակառուցելով այն, դարձնելով այն անխոցելի ապագայում, և այս նախաձեռնության մեջ մեզ համար դժվար օրերում ու սոցիալական բարդ իրավիճակում մենք միայնակ չենք: Վերջին տարիների ինտեգրացիոն գործընթացները նոր հնարավորություններ են բացել մեր երկրի համար: Վարչապետի գլխավորությամբ մեր պատասխանատուները ակտիվ աշխատում են Եվրասիական տնտեսական միության մասնագիտացված կառույցների հետ, որպեսզի նոր-նոր թափ հավաքող այս ինստիտուտները իրենց ակտիվ դերակատարմամբ նոր լուծումներ բերեն Հայաստանի էներգետիկ համակարգի և սակագնի օբյեկտիվ բարձրացման սոցիալական բեռը չեզոքացնելու և ժողովրդի ուսերից վերցնելու համար: Սա գործընթաց է, որն ակտիվորեն իրականացվում է, և մեր պատասխանատուները հետևողականորեն աշխատում են մեր գործընկերների հետ: Հավատում եմ, որ լուծումները չեն ուշանա:
Մյուս կողմից, մենք ունենք նաև մեր քայլերի մշակված քարտեզը:
Երեկ, Հայաստանի Հանրապետության և Ռուսաստանի Դաշնության միջև տնտեսական համագործակցության միջկառավարական հանձնաժողովի ռուսական կողմի նախագահ, ՌԴ տրանսպորտի նախարար Մաքսիմ Սոկոլովի գլխավորած պատվիրակության հետ հանդիպման ժամանակ մենք խոսել ենք այն մասին, որ ճիշտ կլիներ միջկառավարական հանձնաժողովի կողմից դիտարկվեր «ԻՆՏԵՐ ՌԱՕ ԵԷՍ» ընկերության դուստր ձեռնարկության՝ Հայաստանի բաշխիչ ցանցերի գործունեության մանրազնին աուդիտի անցկացման հնարավորությունը նրանց ամբողջ գործունեության ընթացքի համար՝ փորձագիտական հանրության և քաղաքացիական հասարակության ներկայացուցիչների մասնակցությամբ: Այո, խնդիրները, որ կարող են լինել դուստր ձեռնարկությունում, մեր պետական մարմինների աշխատանքով առավելագույնս դուրս են սակագնի հաշվարկից, այնուամենայնիվ, այդ ընկերության հնարավոր խնդիրները մեզ հետաքրքրում են, քանի որ մենք, որպես պետություն, շահութահարկի մասով հետաքրքրված ենք ընկերության շահույթի մեծությամբ: Այս առումով աշխատանքը կարևոր է ոչ միայն ռուսական կողմի համար, այլև Հայաստանի համար: Բայց սա խնդրի մի կողմն է միայն և չի առնչվում սակագնին:
Հիմա սակագնի մասով:
Ես խորապես համոզված եմ, որ սակագնի բարձրացումն արդարացված է:
Նաև համոզված եմ, որ եթե սակագինը չբարձրացնենք, ապա էներգետիկ համակարգը դոմինոյի էֆեկտով փլուզման վտանգի առաջ կկանգնի: Ի վերջո, մեր բնակչության ավելի տարիքով հատվածը երբեք չի մոռանա 1988 թվականին ատոմակայանի փակման հետևանքները. այն ժամանակ էլ գրեթե բոլորը ոգևորված էին այդ չակերտավոր չարիքից ազատվելու հարցում, բայց հետո պարզվեց, որ իրական չարիքը հենց ատոմակայանը փակելն էր, ինչը մինչև այսօր իր բացասական ազդեցությունն է թողնում: Նույնը Նաիրիտի հետ կապված. փակելով այն, դուրս դնելով բնականոն զարգացման ցիկլից` հասանք մի իրականության, երբ պետությունը մինչև այսօր ստիպված ու պարտադրված է հավելյալ գումարներ ծախսել այս ուղղությամբ:
Կարող եմ բերել տասնյակ այսպիսի օրինակներ: Սակագնի մասին շատ ենք խոսել: Ներկայացվել են բարձրացման օբյեկտիվ 3 հիմքերը: Բերվել են հիմնավորումներ, սակայն ակնհայտ է, որ կա վստահության պակաս: Համարում եմ, որ կասկածը, անվստահությունը մեր առաջին թշնամին են նման հարցերում: Առաջին հերթին հենց դա պետք է վերացնենք:
Առաջարկում եմ` ընտրել աշխարհում էներգետիկայի ոլորտում մեծ փորձ ունեցող և մեծ հեղինակություն վայելող որևէ միջազգային խորհրդատվական ընկերություն, եթե հարկ կա, այդ ընտրության ժամանակ ներգրավենք նաև բողոքի ակցիայի ակտիվ տղաներից մի քանիսին, և այդ ընկերությանը հանձնարարենք աուդիտորական ընկերության ներգրավմամբ պատասխանել հետևյալ հարցերին`
• ինչքանով էր հիմնավորված սակագնի բարձրացումը, և• սակագնի չբարձրացման դեպքում ինչպիսի՞ վտանգներ են սպառնում էներգետիկ համակարգին:
Ինչպես նշեցի, համոզված եմ՝ սակագնի բարձրացումը չեղյալ հայտարարելը ծայրահեղ վտանգավոր է: Ուստի, մինչև եզրակացության կազմումը այդ ընկերության կողմից կառավարությունը իր վրա կվերցնի սակագնի բարձրացման ամբողջ բեռը: Անշու՛շտ, մենք ընթացող ծրագրերին կամ սոցիալական ծախսերին չենք դիպչի, այլ գումարներ կգտնենք անվտանգության հետագա ամրապնդման համար նախատեսվող միջոցներից: Իհարկե, մեր անվտանգության խնդիրները հեռու են լուծված լինելուց, և սա մեղմ ասած, բայց կասկածամտության ու անվստահության այն մթնոլորտը, որ այսօր կա, ես նույնպես անվտանգության խնդիր եմ համարում և շատ կարևոր խնդիր: Դա լուծել է պետք:
Իսկ եթե եզրակացությունը հաստատի սակագնի ավելացման հիմնավորվածությունը, ապա այդ պահից սպառողներն առանց որևէ կասկածի հիմքերի կսկսեն վճարել այդ սակագնով:
Եթե եզրակացությունը հաստատի սակագնի ավելացման անհիմն լինելը, ապա կառավարությունը քայլեր կձեռնարկի Բաշխիչ ցանցերից ավել վճարված գումարը հետ գանձելու և թերացած պաշտոնատար անձանց պատասխանատվության կանչելու համար:
Այս պայմաններում դեռևս մի քանի ամիս առաջ կառավարության կողմից սկսված աշխատանքը Բաշխիչ էլեկտրական ցանցերի սեփականատիրոջ փոփո-խության առումով հաստատուն համոզմունք կդառնա՝ չբացառելով նաև այն պետությանը վերադարձնելու և մրցակցային կառավարման հանձնելու տարբերակը:
Սա այն մասով, թե ինչ ուղղություններով ենք մենք աշխատում այս օրերին և աշխատում ենք վաղուց: Իհարկե, բազմաթիվ այլ ուղղություններով էլ ենք առաջ գնացել և լրջորեն քննարկել: Խնդիրը պետք է լուծել, և դրա համար ժամանակ կա:Այս պահին որպես աշխատանքային քննարկումների տրամաբանության մասին իրազեկում, այսքանն էի ցանկանում ասել: Վերջում ավելացնեմ հետևյալը.
Թող որևէ մեկի մտքով չանցնի, թե սակագնի բարձրացման խնդիրների հետ կապված մեր երկրում կան հակադիր կողմեր, թող որևէ մեկի մտքով չանցնի, թե կան մերոնք և ձերոնք. դա անհեթեթ է այնքան, որքան վտանգավոր է: Ես ուզում եմ նաև դիմել բողոքի ձայն բարձրացրած մեր երիտասարդներին. սիրելինե՛րս, մի՛ վախեցեք նոր պատասխանատվություն վերցնել և քայլերի մշակման իրական գործընթացին մասնակից դառնալ՝ դրանով իսկ նվազեցնելով կասկածամտությունը մեր հասարակության մեջ: Այսպիսի քննարկումներ մենք ունեցել ենք տասնյակներով, դրանց ձեզ մասնակից դարձնելուն երբե՛ք դեմ չենք: Գործընթացի վերջում բոլորը բավարարված ու հասկացված են լինելու: Իհարկե, կլինեն մարդիկ որոնք որևէ լուծում չեն ընդունի, որոնց լուծումների գոյությունը ձեռք չի տալիս ու ցանկացած որոշման դեպքում անվանարկելու են, բայց այսօրվա խոսքս նրանց չի վերաբերվում, այլ այն ակտիվ մեծամասնությանը, որոնք խնդրի լուծում են ուզում և չեն օգտագործվի քաղաքական նպատակներով:
Ուրեմն եկե՛ք լուծենք խնդիրը և եկե՛ք այնպես անենք, որ ընթացքում որևէ փորձություն չբերենք մեր գլխին: Չափն անցնել որևէ դեպքում չի կարելի. ոստիկանությունը ի վիճակի է լուծել ցանկացած խնդիր, բայց դա մեր նպատակը չէ: Եվ Աստծո սիրուն, հերի՛ք է կաթվածահար անեք քաղաքի կենտրոնը, պատասխանատվության բեռը բոլորիս ուսերին գնալով միայն ավելանալու է, անցե՛ք ավելի հանգիստ միջոցների, ազատե՛ք Բաղրամյան պողոտան և օգնե՛ք լուծումների փուլում և դրանց հանդեպ վստահության ամրապնդման հարցերում: Այն էներգետիկ համակարգը, որ այսօր մենք փորձում ենք զարգացման հիմքերի վրա դնել, բոլորիս համար է, նախ և առաջ ձեր սերնդի համար: Լսե՛ք իմ բարեկամական հորդորը, անպայմա՛ն լսեք: Մի քանի օրից ցանկանում եմ մի քանիսիդ հրավիրել զրուցելու. հույս ունեմ, որ ավելի հեշտ իրականություն կդարձնենք այդ հանդիպումը: Գործ շատ կա անելու, ևմիասի՛ն պիտի ավարտենք այս դժվարին պրոցեսը:
Այսքանն էի ուզում ասել իբրև մեր այսօրվա խորհրդակցության սկիզբ: Իհարկե, խոսքն ավելի՛ շատ խորհրդակցության մասնակիցներին չէր ուղղված: Այժմ անցնենք մեր բուն աշխատանքին և շարունակենք քննարկել հարցերը, այդ թվում՝ էներգետիկ համակարգի զարգացման ռազմավարական ծրագրի դրույթները, այն ծրագրի, որ նախատեսված է իրականացնել 2016-2036 թթ.», -խորհրդակցության ժամանակ ասել է Նախագահ Սերժ Սարգսյանը:
18:00
ՍիվիլՆեթը ժամը 18:00-ին սկսել է ՈՒՂԻՂ տեսահեռարձակումը:
12:25
«Հայկական ժամանակ» թերթը, վկայակոչելով իր աղբյուրները, գրում է, որ Ռուսաստանում դատապարտված ՀՀ քաղաքացի Հրաչյա Հարությունյանին Հայաստան արտահանձնելու մասին պայմանավորվածություն է ձեռք բերվել ռուսական կողմի հետ: «Փաստորեն, այս հարցը ևս Բաղրամյան պողոտան փակած երիտասարդների շնորհիվ կլուծվի»,- գրում է թերթը:
Ռուսաստանում աշխատող վարորդ, ՀՀ քաղաքացի Հրաչյա Հարությունյանը 2013թ. հուլիսին իր վարած «Կամազ»-ով Պոդոլսկում բախվել էր մարդատար ավտոբուսի, որի հետևանքով զոհվել էր 18 հոգի, վիրավորվել 30-ը: Հրաչյա Հարությունյանը ռուսական դատարանի կողմից դատապարտվել է 6 տարի 9 ամիս ազատազրկման:
Հրաչյա Հարությունյանի նկատմամբ ռուսական լրատվամիջոցների և իրավապահ մարմինների կողմից դրսևորվել էր ազգային արժանապատվությունը վիրավորող խտրական մոտեցում: Նա դատարանի դահլիճ էր բերվել կանացի խալաթով, իսկ ռուսական պետական հեռուստատեսությունը հաղորդել էր, թե «Հայաստանի քաղաքացին բառաչում է»:
Այս գործողությունները բողոքի մեծ ալիք էին բարձրացրել Հայաստանում:
Համառոտ
Հունիսի 26 լույս 27-ի գիշերն անցավ խաղաղ:
Հունիսի 26-ի ուշ երեկոյան հաղորդագրություն եկավ ՀՀ նախագահի մամուլի ծառայությունից այն մասին, որ Սերժ Սարգսյանն ընդունել է Հայ-ռուսական տնտեսական համագործակցության միջկառավարական հանձնաժողովի ռուսական կողմի նախագահ, ՌԴ տրանսպորտի նախարար Մաքսիմ Սոկոլովի գլխավորած պատվիրակությանը: Նախագահականի հաղորդագրությունը երեք կարևոր լուր էր պարունակում.
1. Սերժ Սարգսյանն առաջարկում է ՀԷՑ-ում աուդիտ անցկացնել2. Պերմյակովի գործի վարույթը հանձնվում է ՀՀ քննչական կոմիտեին3. Ռուսաստանը Հայաստանին 200 մլն դոլար վարկ է տրամադրում
***
Էլեկտրաէներգիան թանկացնելու որոշման մասին
Հանրային ծառայությունները կարգավորող հանձնաժողովը (ՀԾԿՀ) հունիսի 17-ին միաձայն որոշում կայացրեց բարձրացնել էլեկտրաէներգիայի սակագինը: Ըստ որոշման՝ օգոստոսի 1-ից էլեկտրաէներգիայի ցերեկային սակագինը գործող 41.85 դրամ/կՎտժ-ից կդառնա 48.78 դրամ, գիշերայինը՝ 31.85 դրամից` 38.78 դրամ: «Հայաստանի էլեկտրական ցանցեր» ընկերությունը ՀԾԿՀ-ին հայտ էր ներկայացրել էլեկտրաէներգիայի սակագինը 17 դրամով բարձրացնելու վերաբերյալ:
Էլեկտրաէներգիայի թանկացման դեմ հունիսի 18-ին Ազատության հրապարակում հանրահավաքը վերածվեց նստացույցի, երկուշաբթի այն տեղափոխվեց Բաղրամյան պողոտա: Երկուշաբթի լույս երեքշաբթի գիշերը ոստիկանությունը բռնի ուժով ցրեց հավաքը՝ բերման ենթարկելով 237 հոգու: Նույն օրը նրանք բոլորն ազատ արձակվեցին:
Երեքշաբթի՝ հունիսի 24-ին սկսված նստացույցը Բաղրամյան պողոտայում շարունակվում է արդեն 4-րդ գիշերը:
ՍիվիլՆեթը տեքստային ուղիղ ռեժիմով լուսաբանել է զարգացումները նաև հունիսի 23-ին, հունիսի 24-ին, հունիսի 25-ին և հունիսի 26-ին:
Պատմություններ
