Civilnet
Լաս Վեգասում ընթացող Աշխարհի վարկանշային առաջնությունում Հայաստանի հունահռոմեական ոճի հավաքականի առաջին մեդալը նվաճել է Արթուր Ալեքսանյանը:
Ինչպես հաղորդում է «Մեդիամաքս սպորտը», նա մեկը մյուսի հետևից անցկացրեց տպավորիչ գոտեմարտեր, հաղթեց ճապոնացի, նորվեգացի, ուկրաինացի, ռումինացի ըմբիշներին և դուրս եկավ եզրափակիչ:
Այստեղ Ալեքսանյանն ուժերը չափեց Իրանի ներկայացուցիչ Ղասեմ Ռեզայի հետ: Առաջին իսկ րոպեներից հայ մարզիկն իր ձեռքը վերցրեց ընթացքն ու վաստակեց առաջին երկու միավորը: Երկրորդ մրցափուլում ևս Ալեքսանյանն անկասելի էր ու տոնեց գեցեղիկ հաղթանակ` դառնալով աշխարհի չեմպիոն:
Այսպիսով, Հայաստանի հունահռոմեական հավաքականը` Լևոն Ջուլֆալակյանի գլխավորությամբ, արդեն իսկ նվաճել է Օլիմպիական խաղերի երկու ուղեգիր: Բացի Ալեքսանյանից` Ռիոյում հանդես կգա նաև Միհրան Հարությունյանը:
Արթուր Ալեքսանյանն աշխարհի չեմպիոնի կոչումն առաջին անգամ նվաճել էր 2014թ. Տաշքենդում:
Պատմություններ
