Ֆրանկոֆոնիայի նստաշրջանը «Ցեղասպանության կանխարգելման մասին» բանաձև է ընդունել
Civilnet
Հոկտեմբերի 10-11-ին Երևանում անցկացված Ֆրանկոֆոնիայի միջազգային կազմակերպության նախարարական համաժողովի 31-րդ նստաշրջանի ընթացքում ընդունվել է հինգ բանաձև, այդ թվում` Հայաստանի նախաձեռնած «Ցեղասպանության կանխարգելման մասին» բանաձևը:
Ինչպես հաղորդում են արտգործնախարարության մամուլի ծառայությունից, բանաձևում վկայակոչվում է ապրիլի 24-ին Ֆրանկոֆոնիայի գլխավոր քարտուղար Միկայել Ժանի հայտարարությունը՝ Հայոց ցեղասպանության 100-րդ տարելիցի կապակցությամբ, որտեղ հարգանքի տուրք էր մատուցվում Մեծ եղեռնի զոհերի հիշատակին և զորակցություն հայտնվում հայ ժողովրդին։
Բանաձևում մասնավորապես նշվում է, որ կազմակերպությունը խստորեն դատապարտում է մարդկությանը հսկայական կորուստներ պատճառած բոլոր ցեղասպանությունները և մարդկության դեմ հանցագործությունները, և հարգանքի տուրք մատուցելով այդ հանցագործությունների զոհերի հիշատակին՝ պարտավորվում է միջոցներ ձեռնարկել ցեղասպանության, մարդկության դեմ հանցագործությունների կանխարգելման մեխանիզմները ամրապնդելու նպատակով:
Համաձայն ընդունված բանաձևի՝ կազմակերպությունը պարտավորվում է նաև ամրապնդել պետությունների և կառավարությունների միջև համագործակցությունը այդ հանցագործությունների պատասխանատուների անպատժելիությանը վերջ դնելու համար:
Իրադարձություն
Պատմություններ
