Իտալական Իվրեայի քաղաքային խորհուրդը ճանաչել է Հայոց ցեղասպանությունը
Civilnet
Իտալիայի Պիեմոնտե նահանգի Իվրեայի քաղաքային խորհուրդը հոկտեմբերի 12-ին կայացած նիստին միաձայն ճանաչել է Հայոց ցեղասպանությունը:
Ինչպես հաղորդում են ՀՀ արտգործնախարարության մամուլի ծառայությունից, հայտարարությունում նշվում է, որ ճանաչելով պատմական ճշմարտությունը` քաղաքային խորհուրդն իր զորակցությունն է հայտնում հայ ժողովրդին և նրա անքակտելի իրավունքների պաշտպանությանն ուղղված ջանքերին:
Նիստի պատվավոր հյուրերն են եղել հայ գրող և ռեժիսոր Վազգեն Բերբերյանը և Իվրեայի Իտալական պարտիզանների ազգային ասոցիացիայի ներկայացուցիչները:
Քաղաքային խորհուրդը հույս է հայտնել, որ Եվրոպական խորհրդարանը քայլեր կձեռնարկի՝ Եվրամիության անդամակցության թեկնածու Թուրքիայի կողմից Հայոց ցեղասպանությունը պաշտոնապես ճանաչելու և դատապարտելու ուղղությամբ:
Իվրեա փոքր քաղաք է Իտալիայի հյուսիս-արևմուտքում: Նրա բնակչության թիվը 24 409 մարդ է:
Այս ամիս` ավելի վաղ, Հայոց ցեղասպանությունը ճանաչել էր իտալական Մարկեի նահանգային խորհուրդը:
Այս տարվա մարտին Իտալիայի Տոսկանայի նահանգի նահանգային խորհուրդն էր ընդունել Հայոց ցեղասպանությունը ճանաչող բանաձև` Ցեղասպանության 100-րդ տարելիցի կապակցությամբ զորակցություն հայտնելով հայ ժողովրդին:
Իտալիան ճանաչել է Հայոց ցեղասպանությունը 2000թ.:
Իրադարձություն
Պատմություններ
