Իտալիայի Աբրուցցո նահանգը և Ռավեննա քաղաքը ճանաչել են Հայոց ցեղասպանությունը
Civilnet
Իտալիայի Աբրուցցո նահանգը հոկտեմբերի 27-ին ճանաչել է Հայոց ցեղասպանությունը:
Ինչպես հաղորդում են ՀՀ արտգործնախարարության մամուլի ծառայությունից, նահանգային խորհրդի կողմից միաձայն ընդունված բանաձևում համերաշխություն է հայտնվում հայ ժողովրդին՝ Հայոց ցեղասպանության 100-րդ տարելիցի կապակցությամբ և պատմական ճշմարտության ճանաչման ու մարդու իրավուքների պաշտպանության համար նրա պայքարին:
Փաստաթղթի նախագիծը ներկայացրած նահանգային խորհրդի անդամ, իշխող ժողովրդավարական կուսակցության ներկայացուցիչ Լուչիանո Մոնտիչելլին բանաձևի ընդունումից հետո հայտարարել է. «Այսօր մենք մի գեղեցիկ էջ գրեցինք մեր նահանգի քաղաքական պատմության մեջ: Նման կարևոր հարցի վերաբերյալ բանաձևի միաձայն ընդունումը նահանգային խորհրդի հասունության մեծ վկայությունն է: Հուսով եմ, որ մեր ամենօրյա հոգսերից այդքան հեռու անցյալում տեղի ունեցած անարդարությունների մասին հիշողությունը մեզ կուղղորդի դատապարտելու նաև մեր օրերում տեղի ունեցող հետապնդումներն ու բռնությունները և գործնական օգնություն ցուցաբերելու դրանց զոհերին»:
Աբրուցցոյի նահանգային խորհուրդը Իտալիայի տեղական ինքնակառավարման մարմինների մակարդակով Հայոց ցեղասպանությունը ճանաչած 99-րդ խորհուրդն է:
ԱԳՆ մամուլի ծառայության հաղորդմամբ` հոկտեմբերի 22-ին Հայոց ցեղասպանությունը նաև ճանաչել է Իտալիայի Ռավեննա քաղաքը:
Այս ամիս` ավելի վաղ, Հայոց ցեղասպանությունը ճանաչել էին Իտալիայի Պիեմոնտե նահանգի Իվրեայի քաղաքային խորհուրդը և Մարկեի նահանգային խորհուրդը:
Այս տարվա մարտին Իտալիայի Տոսկանայի նահանգի նահանգային խորհուրդն էր ընդունել Հայոց ցեղասպանությունը ճանաչող բանաձև` Ցեղասպանության 100-րդ տարելիցի կապակցությամբ զորակցություն հայտնելով հայ ժողովրդին:
Իտալիան ճանաչել է Հայոց ցեղասպանությունը 2000թ.:
Իրադարձություն
Պատմություններ
