Պետդեպը Հայաստանի իշխանություններին կոչ է անում հետաքննել ընտրախախտումները

«Մենք մտահոգված ենք ոչ կուսակցական դիտորդների և Հայաստանի տարբեր քաղաքական ուժերի կողմից հնչեցված՝ ընտրախախտումների վերաբերյալ պնդումներով: Կոչ ենք անում Հայաստանի իշխանություններին լիարժեք հետաքննել ընտրախախտումների վերաբերյալ բոլոր արժանահավատ հայտարարությունները՝ երաշխավորելու հանրաքվեի արդյունքների վստահելիությունը». դեկտեմբերի 8-ին ճեպազրույցի ժամանակ այսպիսի հայտարարություն է արել ԱՄՆ Պետքարտուղարության խոսնակ Ջոն Քըրբին:

«Այս հարցերը, որոնք նման են նախորդ ընտրություններում ԵԱՀԿ դիտորդների կողմից գրանցված խնդիրներին, պետք է հաշվի առնվեն նոր Ընտրական օրենսգրքում, որպեսզի ապագա ընտրությունները հայ ժողովրդի կողմից դիտարկվեն որպես արժանահավատ, լեգիտիմ և իրենց կամարտահայտության իրական արտացոլում»,- հավելել է Ջոն Քըրբին։

***

Պաշտոնական նախնական արդյունքներով սահմանադրական փոփոխություններին «այո» է ասել 825 851 ընտրող, «ոչ»`  421 600 ընտրող:

Դեկտեմբերի 6-ին սահմանադրական փոփոխությունների հանրաքվեի և քվեների հաշվարկի ընթացքում ՍիվիլՆեթը, այլ լրատվամիջոցներ, բազմաթիվ դիտորդներ ու քաղաքացիներ արձանագրել էին բազմաթիվ ընտրախախտումներ:

Նոր Սահմանադրությամբ Հայաստանը կիսանախագահական համակարգից անցում է կատարում կառավարման խորհրդարանական համակարգի:

Հայաստանում ԱՄՆ դեսպանությունը հանրաքվեից հետո հանդես է եկել հայտարարությամբ, որում գոհունակություն է հայտնել «ՀՀ ժողովրդին ու կառավարությանը` բաց բանավեճից հետո դեկտեմբերի 6-ին տեղի ունեցած սահմանադրական հանրաքվեի խաղաղ անցկացման կապակցությամբ»: