Civilnet
Թուրքիան խիստ մտահոգված է Սիրիայում հրադադարի վերաբերյալ համաձայնագրով՝ այնտեղ չդադարող մարտերով պայմանավորված. այսօր մամուլի ասուլիսի ժամանակ հայտարարել է Թուրքիայի նախագահ Ռեջեփ Թայիփ Էրդողանի օգնական և խոսնակ Իբրահիմ Քալընը:
Էրդողանի խոսնակը նշել է, որ Թուրքիան Սիրիայում ցամաքային օպերացիա սկսելու մտադրություն չունի, սակայն «արձագանքելու է ցանկացած միջադեպի, որը կսպառնա իր ազգային անվտանգությանը՝ ռազմական ուժի կիրառման կանոնների համապատասխան»:
«Մենք սկզբունքորեն կողմ ենք այս հրադադարին, սակայն, ցավոք, լուրջ մտահոգություն ունենք հրադադարի հետ կապված, քանի որ մարտերը շարունակվում են»,- ասել է Քալընը:
Փետրվարի 25-ին Թուրքիայի վարչապետ Ահմեդ Դավութօղլուն հայտարարել է, որ հրադադարը Սիրիայում Թուրքիայի համար «պարտադիր չի լինի, եթե իր անվտանգությանը որևէ բան սպառնա»: Անկարան, Դավութօղլուի խոսքով, անհրաժեշտ քայլեր կձեռնարկի ինչպես «Իսլամական պետության», այնպես էլ Սիրիայի քրդական զինուժի դեմ [YPG, «Ժողովրդական պաշտպանության ուժեր» - ՍիվիլՆեթ]:
Փետրվարի 22-ին Ռուսաստանի և ԱՄՆ նախագահներ Վլադիմիր Պուտինն ու Բարաք Օբաման հայտարարել էին Սիրիայում հրադադարի շուրջ պայմանավորվածություն ձեռք բերելու մասին: Հրադադարն ուժի մեջ կմտնի փետրվարի 27-ին:
Հրադադարի պայմանները տարածվում են «Իսլամական պետության», «Ջաբհաթ Ալ-Նուսրա»-ի և ՄԱԿ-ի Անվտանգության խորհրդի կողմից ահաբեկչական ճանաչված այլ խմբավորումների վրա:
Պատմություններ
